«Արմավիր» ՔԿՀ-ում գտնվող Ժիրայր Սեֆիլյանը մտահոգություն է հայտնել «Սասնա ծռերի» անդամներ՝ Արմեն Բիլյանի, Սմբատ Բարսեղյանի և Արայիկ Խանդոյանի առողջության կապակցությամբ:
Նա կոչ է արել քաղաքացիներին՝ անտարբերություն չցուցաբերել և ստիպել համակարգին՝ լուծել հացադուլավորների՝ «Արմավիր» ՔԿՀ տեղափոխվելու հարցը:
Իր կոչում Սեֆիլյանը նշել է․
«Քաղաքացիական հասարակությու՛ն
Ակտիվ քաղաքացինե՛ր
Սասնա Ծռերից երեք հոգի՝ Արայիկ Խանդոյանը, Արմեն Բիլյանը և Սմբատ Բարսեղյանը նախորդ տարվա դեկտեմբերից հացադուլ են հայտարարել: Արմեն Բիլյանը և Սմբատ Բարսեղյանն արդեն մոտ են կյանքին սպառանցող վտանգի շեմին:
Մինչդեռ դուք լուռ եք՝ կարծես թե վերջ չունեցող «տոնական» կերուխումի և ծույլ հանգստի ընթացքին անձնատուր:
Ինչի՞ եք սպասում: Որ Հաց Բերողի ճակատագի՞րն ունենան և հետո ծափերով թաղե՞ք: Մինչդեռ Հաց Բերողի տանջամահությունը, նրա անձնազոհությունը պետք է ցասման վերածվեր:
Հիմա էլ նույն անտարբերությունն է …
Սա այն դեպքը չէ, որ հնարավոր չլինի համակարգին ճնշել և ստիպել, որ պարզունակ մի հարց լուծվի՝ տղաները տեղափոխվեն «Արմավիր» ՔԿՀ:
Մի՞թե հասել ենք գիտակցության մթագնման և արժանապատվության անկման մի վիճակի, որից այն կողմ կրավորական մահն է:
Տղաներն իրենց արարքով, իրենց գործով են ապացուցել, որ պատրաստ են իրենց կյանքը զոհաբերել հանուն սիրելի ժողովրդի, մինչդեռ դրա փոխարեն ի՞նչ են ստանում:
Հաց Բերողի, Արմեն Բիլյանի, Սմբատ Բարսեղյանի, Արայիկ Խանդոյանի տեսակը կորցնելով՝ Հայրենիք ենք կորցնում:
Սթափվելու և կրավորական թմբիրից դուրս գալու ժամանակն է»:
Հիշեցնենք, որ «Սասնա ծռերի» անդամներ Սմբատ Բարսեղյանը, Արմեն Բիլյանը և Արայիկ Խանդոյանը (Միայնակ Գայլ), տևական ժամանակ է հացադուլի մեջ են գտնվում: Սմբատ Բարսեղյանն ու Արմեն Բիլյանն այս եղանակով պահանջում են իրենց տեղափոխել «Արմավիր» ՔԿՀ: Արմեն Բիլյանը հացադուլի մեջ է դեկտեմբերի 19-ից, Ս. Բարսեղյանը` դեկտեմբերի 21-ից, իսկ Արայիկ Խանդոյանն, ի զորակցություն վերջինների, հացադուլ սկսեց դեկտեմբերի 29-ից: