Որ նոտայի վրա ավարտվեց քաղաքական տարին և ինչ է սպասվում 2018-ին
2017-ը քաղաքական գործընթացների առումով ակտիվ էր: Անցկացվեցին Ազգային ժողովի ու ՏԻՄ ընտրություններ, որոշ ուժեր դուրս մնացին պայքարից, ի հայտ եկան նորերը, ձևավորվեցին դաշինքներ, ՀՀԿ-ն ու ՀՅԴ-ն քաղաքական կոալիցիա կազմեցին: Գալիք 2018-ը ևս քաղաքական ակտիվ տարի է լինելու: Փոփոխված Սահմանադրությամբ՝ ապրիլից երկրի առաջին դեմքը ոչ թե նախագահն է լինելու, այլ՝ վարչապետը: Նախագահ կդառնա այն անձը, որին կհաջողվի ստանալ պատգամավորների ընդհանուր թվի երեք քառորդի, այսինքն՝ 105-ից առնվազն 79-ի ձայները։ Այս պահի դրությամբ ՀՀ նախագահի թեկնածու է առաջադրել միայն «Ելք» խմբակցությունը՝ հայտարարելով «Ծառուկյան» դաշինքի հետ բանակցությունների մասին: ««Ելք»-ը բանակցություններ կսկսի «Ծառուկյան» դաշինքի հետ Արտակ Զեյնալյանի առաջադրման համար անհրաժեշտ՝ պատգամավորների ¼-ի ստորագրություններն ապահովելու համար»»,- հայտարարել էր ընդդիմադիր դաշինքը: Օրեր առաջ անդրադառնալով թեմային՝ Գագիկ Ծառուկյանը նշել էր, որ իրենք թեկնածու չեն առաջադրի. «Եթե մեր քանակն այսօր քիչ է, ինչի՞ հիման վրա մենք պետք է գնանք: Եթե մերը 31 պատգամավոր է՝ հարկավոր է 75-ը, ինչի՞ համար պետք է դնենք: Մենք մեր ծանր տեղը երբեք չենք թեթևացնելու»: Հարցին՝ պատրաստվո՞ւմ են արդյոք սատարել «Ելք»-ի թեկնածուին, արձագանքել էր․ «Դեռ ինձ այդ թուղթը չի հասել: Անցնենք առաջ»: Ինչ վերաբերում է վարչապետի պաշտոնին, Կարեն Կարապետյանը բազմիցս ասել է, որ դեմ չէ 2018-ի ապրիլից ևս զբաղեցնել այդ պաշտոնը: Մյուս կողմից՝ Սերժ Սարգսյանի բոլոր քայլերը վկայում են, որ նա չի ցանկանում իր լիազորությունների ավարտից հետո իշխանության ղեկը փոխանցել որևէ մեկին: Վերջին ամիսներին Սերժ Սարգսյանի «անփոխարինելիության» քարոզարշավն է ընթանում ՀՀԿ-ի կողմից, որին կհաջորդի Սարգսյանին «ազգովի խնդրելու» գործընթացը: Հիշեցնենք՝ պատասխանելով հարցին՝ ինչով է զբաղվելու 2018-ի ապրիլից հետո, Սերժ Սարգսյանն ասել էր, որ ժամանակը դեռ չի եկել, երբ կգա՝ կհայտարարի: Կշարունակի՞ մնալ քաղաքականության մեջ՝ պատասխանել էր. «Տեսնենք»։ |