Երեկ Կատալոնիայում անցկացված արտահերթ ընտրությունների արդյունքների համաձայն՝ Կատալոնիայի անկախության կողմնակից կուսակցությունները բացարձակ մեծամասնություն են ստացել ինքնավարության խորհրդարանում: Այս մասին վկայում են մոտ 100% ձայների հաշվարկից հետո հրապարակված տվյալները:
Կատալոնիայի նախկին առաջնորդ Կառլես Պուչդեմոնը հայտարարել է, որ եկել է ինքնավարության անմիջական ղեկավարման մասին իսպանական սահմանադրության հոդվածի չեղարկման ժամանակը:
Կատալոնիայի անկախության կողմնակից 3 քաղաքական շարժումները տեղի օրենսդրական մարմնում 135-ից 70 տեղ են ստացել:
Ըստ նախնական տեղեկությունների՝ «Միասին հանուն Կատալոնիայի» կուսակցությունը, որը ղեկավարում է Պուչդեմոնն, ստացել է ձայների 21,6%-ն, ինչը կուսակցությանը 34 մանդատ է ապահովում:
«Կատալոնիայի ձախ հանրապետականներ» կուսակցությունը, որը ղեկավարում է Կատալոնիայի կառավարության ղեկավարի նախկին տեղակալ Օրիոլ Ժունկերասը, ով գտնվում է Մադրիդի բանտում, ստացել է 32 մանդատ:
Առաջնորդում է «Քաղաքացիներ» կուսակցությունը՝ ձայների 25,3%-ով և 37 մանդատով: