«Մամա՛, ես ինչի՞ ծնվեցի, էն երեխեքը, որ տենց արեցին, իրանք շատ ուժեղ են, ես ուժեղ չեմ». թարթիչները կտրած երեխայի մայրը՝ որդու հոգեվիճակի մասին
Երևանի Ջոն Կիրակոսյանի անվան թիվ 20 դպրոցում 1-ին դասարանցիների միջև տեղի ունեցած վիճաբանության շուրջ դեպքից մեկ օր հետո խոսել էինք դպրոցի տնօրեն Անահիտ Խոսրովյանի հետ: Երեկ՝ դեպքից մեկ ամիս անց, տնօրենի հետ զրուցեցինք զարգացումների մասին: Վերջինը նշեց, որ գործը Քննչական կոմիտեում է, երեխային էլ տեղափոխել են Ադամյան կրթահամալիր: Մեզ հետ զրույցում դպրոցի տնօրենը հայտնեց, որ ուսուցչական անձնակազմի, երեխայի հոր և վարորդի ցուցմունքը նույնաբովանդակ է եղել: Այսօր MAMUL.am լրատվականի խմբագրություն էր զանգահարել տուժող Արտյոմ Սարգսյանի մայրը՝ Մարինե Սարգսյանը և նշում էր, որ իր նախկին ամուսինը նման ցուցմունք չի տվել: «Ինքը կարող է՝ գնացել է ոստիկանություն, բայց ո՞նց կարող է սուտ ասել: Ես հիմա փաստաբան եմ վարձել, որպեսզի հեռախոսային խոսակցությունները հանել տամ: 2-3 անգամ զանգել եմ դասղեկին, խնդրել, որ՝ եկեք մեր իջից դուրս չգա, ճիշտ լուծում տվեք, ես էլ չեմ ուզում՝ երեխաս ուժեղ սթրես է տարել: Ասում եմ, որ դեպքն ուղղակի խփել կամ կռվել չի, բռնություն է: Ո՞նց կարելի է այդ կարգի սուտ լինել: Ինքն ասում է՝ այո, մենք տեսանյութերը կհանենք, դուք կգաք, կտեսնեք: Ոչ մի տեսանյութ չեղավ, ու մի հատ էլ ստում են, թե նման բան չի եղել: Բա որտե՞ղ է եղել, ո՞նց է եղել, ես ուզո՞ւմ էի իմ երեխու շուրջն այսքան սուտ աղմուկ լիներ»: Թարթիչները կտրած երեխայի մայրը վրդովված էր նաև, որ բոլորը ներկայացնում են, թե իր երեխան հոգեբանական խնդիրներ ունի: «Եթե մի երկրում ԿԳ նախարարը կարող է դուրս գալ, սուտ ու անգրագետ ձևով խոսել, էլ ի՞նչ պարզել այստեղ: Իմ երեխուն ու ինձ էլ հիվանդ են հանել: ԿԳ նախարարն ասում է, որ երեխան հոգեկան շեղումներ ունի, հիվանդ երեխա է: Ես դա մի քանի հեռուստաընկերություններով լսել եմ: Ես որպես մայր ո՞նց կլինեմ, համ երեխուս տենց անեն, տան ձեռս, համ էլ նման բաներ ասեն: Իմ երեխան ծնվել է 700 գրամ, ես իրան նենց եմ պահել... Ամենահասարակ պատվաստումը ես տանում, արտասահմանում եմ անում: Շատ ուշադիր մայր եմ: Իսրայել եմ տարել երեխայիս, որովհետև փոքր ժամանակ վիտամիններ խմելուց երիկամի մեջ փոքր քար էր առաջացել: Քարը թե´ Հունաստանում, թե´ Հայաստանում հեռացնելու դեպքում մեծ սպի էր մնալու: Իսկ իրենք վերածեցին, թե երեխան հոգեկան խնդիրներ ունի ու տարել եմ բուժման: Երեխես հլը կյանք չմտած՝ կյանքից հիասթափվել է: Ես և իմ երեխան Հունաստանի քաղաքացիներ ենք: Դիմեցի այնտեղի փաստաբանին, զանգահարեց հեռուստաընկերություններ, որպեսզի այնտեղ հաղորդումով ցույց տային, մեծ աղմուկ բարձրանար, քանզի ես զգացել էի, որ այստեղ սաղ սուտ են ներկայացնում: Հետո ոստիկանությունում ինձ ասացին՝ պետք չի միջազգային թեմա դառնա, մտածեցի՝ լավ, միգուցե օրենք կա: Ես չեմ ուզում, որ քրեական գործ լինի իրենց վրա, ուղղակի ուզում եմ ճշմարտությունը և ներողություն խնդրեն»: Մեզ հետ նախնական զրույցում դպրոցի տնօրեն Անահիտ Խոսրովյանը նշել էր, որ դա երեխայի մոր հորինած հեքիաթն է, որը նույնպես բարկացրել է Մարինե Սարգսյանին: «Արդարության համար մենք մինչև Եվրոդատարան գնալու ենք: Ամոթ է, այդ ի՞նչ սերունդ է դպրոցը մեծացնում: Այսօր սկոտչ են տարել, թարթիչներ են կտրում, վաղը դանակ կտանեն: Այդ երեխաների ծնողներն էլ սպառնում են ինձ, փոխանակ ներողություն խնդրեն: Ես ոչ տնօրենին եմ ճանաչում, ոչ՝ դասղեկին, ինչի՞ պետք է իմ երեխայի պատվի հետ խաղայի: Անգրագետի նման ասում է՝ մոր հեքիաթներն է: Իմ ինչի՞ն էր պետք: Կամ տնօրենն ասում է՝ բաժանված ընտանիքի մատաղացուն եմ դարձել: Քո ի՞նչ բարոյական իրավունքն է՝ ես բաժանված եմ, թե չէ: Երկրորդն էլ, ես ասել եմ, որ մենք բաժանված լինելով՝ այնքան առողջ հարաբերություններ ունենք, որ նույնիսկ չբաժանվածներն այդպես չեն: Մենք ծնունդներին միասին քաղաքից դուրս ենք գնում, տոները միասին ենք անում: Հոկտեմբերի 27-ից մինչև 30-ը մենք միասին Դիլիջանում ծնունդ ենք արել, նկարները կան, իր ի՞նչ գործն է, փոխանակ իր դպրոցին նայի, իմ կյանք է մտնում»: Արտյոմի մայրը ներկայացրեց նաև, թե ինչպես է դեպքը տեղի ունեցել: «Չորեքշաբթի վարորդը երեխային տանում է դպրոց: Պապան պետք է ուրբաթ օրը գնար գործուղման: Շաբաթը մեկ կամ երկու անգամ երեխաս մնում է իր պապայի մոտ: Առավոտյան վարորդը տանում է, մեկ էլ հայրը զանգում է ինձ և ասում, թե երեխայի թարթիչները կտրված են, բայց մի անհանգստացիր, մի փոքր բան է, երևի ինքն է արել: Երեխան չորեքշաբթի և հինգշաբթի մնաց պապայի մոտ: Ուրբաթ օրը, երբ եկավ տուն, տեսնեմ այս կողմից էլ, այն կողմից էլ լրիվ կտրված է: Քիթն ուռած, կարմիր, մի քիչ կապույտ, դոշը քերծված: Ուզում էի գնալ դպրոց, երեխայի հայրն ասաց՝ ուրբաթ է, թող մնա երկուշաբթի: Մյուս օրը զանգում եմ դասղեկին և ասում, որ ձեր դպրոցում նման բան է եղել իմ երեխայի հետ: Դասղեկն ինձ ասում է՝ հանգստացեք, տեսախցիկները կնայենք և ամեն ինչ կպարզենք: Ասացի՝ շատ եմ խնդրում, ճիշտ լուծում տվեք, թող մեզնից դուրս չգա: Ես ոչ մի կերպ չէի կարողանում հանգստանալ: Դրանից հետո հայրն ասաց՝ քանի որ ես եմ տարել երեխային այդ դպրոց, ես կգնամ, ծնողներին կկանչենք, ներողություն կխնդրեն: Հետո հայրը երեխային բերեց ու ասաց, որ Արտյոմը դասարանում ցույց է տվել՝ ովքեր են եղել, կանչել են տնօրենի սենյակ, այդ երեխաներն ասել են՝ հա, մենք խփել ենք, բայց թարթիչների մասին չեն խոսել: Հետո ես զանգեցի դասղեկին, ասացի՝ դուք ինձ խոսք էիք տվել, որ կլուծեք այս հարցը: Ինքն էլ պատասխանեց, թե երեխաներն անկեղծ ասացին՝ մենք տենց բան չենք արել: Ես նշեցի, որ հիմա մեծ աղմուկ կբարձրացնեմ»: Արտյոմի մոր խոսքով՝ դեպքի հաջորդ օրը դպրոցում հադես է եղել և երեխան պատմել է, որ այդ օրն էլ են իրեն նեղացրել: Հետաքրքրվեցինք, թե ինչ հոգեվիճակում է այս պահին գտնվում Արտյոմը և ինչպես է իրեն զգում նոր դպրոցում: «Սկզբում ավելի վատ վիճակում էր: Ուղղակի հիմա շատ հաճախ ասում է՝ մամա՛, ես ինչի՞ ծնվեցի, էն երեխեքը, որ տենց արեցին, իրանք շատ ուժեղ են, ես ուժեղ չեմ: Ես ինչի՞ եմ ծնվել, որտեղի՞ց ընկնեմ: Իսկ այս դպրոցում երեխաների հետ էլ է շփվում: Այնքան գոհ եմ իրենցից, պրոֆեսիոնալ տնօրեն է, ճիշտ մոտեցումով մանկավարժ: Այնպես վերաբերվեցին, որ երեխան շուտ ինտեգրվեց»,- եզրափակեց Մարինե Սարգսյանը: |