Օրեր առաջ ՀՀ ոստիկանապետի նախկին խորհրդական Նարեկ Մալյանը ֆեյսբուքյան իր էջում բարձրացրել էր «Ռոսիա» կինոթատրոնի շենքին կից շինությունների կառուցման խնդիրը՝ հրավիրելով Երևանի ավագանու «Ելք» խմբակցության անդամների ուշադրությունը:
Ալեն Սիմոնյանն, արձագանքելով Մալյանի բարձրացրած հարցին, գրել էր. «Քեզ դա հետաքրքրում ա, քանզի Սուքիասյանների՞ն է պատկանում, թե՞ ուղղակի մտահոգ քաղաքացի եք, ում նախկինում չէր հետաքրքրում ոստիկանությունից բացի ոչինչ։ Ինչ վերաբերում է հերթական քրչի բազառին, իմ տեղեկություններով, հակառակն է տեղի ունենում, մայթն ազատվում է վաճառականների կրպակներից»:
«Ելք» խմբակցության ղեկավար Դավիթ Խաժակյանն, ով խոստացել էր տեղում ուսումնասիրություն իրականացնել, այսօր ներկայացրել է արդյունքները. «Ուսումնաիրությունը ցույց տվեց, որ շենքի ֆասադը փոփոխվել է և սկսվել է կրպակների շինարարություն: Թեպետ այդ կրպակները նախատեսված են նախկին վրանների փոխարեն, սակայն դրանք ակնհայտորեն ձևավորվել են շենքի ֆասադի առաջ գալու և լայն աստիճանների հաշվին, ինչը բացասաբար եմ գնահատում և կարծում եմ, որ նախագիծը նման բան չպետք է նախատեսեր: Շենքի արտաքին տեսքի փչացման ևս մի դրվագ է այս շինության ավելի երկար լինելը, քան հենց շենքի տանիքն է, ինչը ևս անհամաչափություն է առաջացնում նոր ձևափոխումների և եղած շենքի միջև:
Ուսումնասիրել եմ նաև նոր շենքի նախագիծը: Տարածքը հանդիսանում է մասնավոր սեփականություն և առկա է շինթույլտվություն, ինչը ցավոք սրտի բարդացնում է նման գործունեության վերանայման հարցը»,- եզրափակել է նա՝ կցելով լուսանկարները: