Հայ անվանի նկարիչ Հակոբ Կոջոյանը ժամանակակից հայկական գրքային գրաֆիկայի հիմնադիրն է: Կոջոյանը դեռ փոքր տարիքից զբաղվել է ոսկերչությամբ, զարդանախշությամբ, որն էլ եղավ նրա գրաֆիկայի հիմնական ոճը:
Այսօր նկարչի ծննդյան օրն է: Նա ծնվել է 1883-ին` Ախլցխայում, իսկ մանկությունն անցել է Վլադիկավկազում: Կոջոյանի աշխատանքները ցուցադրված են Լենինգրադի, Կիևի ռուսական թանգարաններում, Մոսկվայի «Արևելքի ժողովրդների» թանգարանում և մեր Ազգային պատկերասրահում: Կոջոյանի ձեռագրին են պատկանում «Սասնա ծռեր» հայկական էպոսը, Թումանյանի «Փարվանան», Սայաթ-Նովայի երգերի ժողովածուն և այլն: Նա ստեղծել է արծաթե իրերի նմուշներ, նաև կերամիկայի և հախճապակու վրա է աշխատել: Այդ ոլորտում նկարչի արվեստն իր դրոշմն է թողել հետագա սերունդների ստեղծագործական ճաշակի վրա:
«Նա եզակի էր ևʹ գունանկարում, ևʹ գրաֆիկայում, ևʹ կատարման ձևի մեջ: Նրա գեղանկարչությունն ունի հիանալի գույն. ոսկեգույնի ու նարնջագույնի համադրումը կապույտի հետ կտավին տալիս է թարմություն և մենք հիմա էլ, երբ Կոջոյանի կտավներին ենք նայում, թվում է, թե հենց այսօր արված աշխատանք է... ևʹ օդը, ևʹ գունային թարմությունը»,- այսպես է բնորոշում Հակոբ Կոջոյանին նկարիչ Վիկտոր Հովհաննիսյանն, ում խոսքով` Կոջոյանի ներդրումը մեծ դեր ունի հայ նկարչության մեջ:
Կոջոյանն աշխատել է մինչև կյանքի վերջին օրերը: Հակոբ Կոջոյանը կյանքի վերջին օրերին փորձում էր կտավին հանձնել Անիի ավերակները: Նա հեռացավ՝ առանց ավարտելու վերջին ստեղծագործությունը, որն այսքան տարի անց պահվում է այնպես, ինչպես թողել էր վարպետը: