Ռուսաստանի անվտանգության դաշնային ծառայությունը Մոսկվայի տարածաշրջանում ամանորյա տոներին նախապատրաստվող ահաբեկչություն է կանխել, հաղորդում է РИА Новости-ն՝ հղում անելով անվտանգության դաշնային ծառայության և ազգային հակաահաբեկչական հանձնաժողովի ղեկավար Ալեքսանդր Բորտնիկովին:
Նրա խոսքով՝ Մոսկվայի տարածաշրջանում կանխվել է Կենտրոնական Ասիայից հանցավոր խմբավորման գործունեությունը, որն ահաբեկչական հարձակումներ, այդ թվում նաև մահապարտների մասնակցությամբ հարձակումներ էր նախապատրաստում ամանորյա տոների ժամանակ:
Ահաբեկիչներից ինքնաշեն պայթուցիկ սարքեր, հրազեն և զինամթերք է առգրավվել, ոչնչացվել է ահաբեկչական միջոցների պատրաստման լաբորատորիան:
Բորտնիկովը նաև հայտնել է, որ 2017թ. Ռուսաստանում 78 ահաբեկիչ է ոչնչացվել, ձերբակալվել է 1018 հանցագործ: