«Եթե յուրայինները երբևէ պատժվել են, ապա՝ մասնաբաժին չտալու համար, ինչպես եղավ Վազգեն Խաչիկյանի կամ Մարգար Օհանյանի դեպքում». Արամ Հարությունյանը՝ նախագահի ելույթի մասին
«Սերժ Սարգսյանի մոտ պարբերաբար նման մտքեր առաջանում են: Եթե ժամանակին նա Տիգրան Սարգսյանին ասում էր` պետք է գլխից բռնել, ապա, հիմա, նա միանգամից իջավ ավելի ներքև, և փաստորեն, ուզում է ոտքերից բռնել: Անկախ ամեն ինչից, մենք հասկանում ենք, որ Հայաստանում բոլոր խնդիրները մեկ շղթայով են կապված` սկսած ներքևից մինչև վերև և ինքը շատ լավ է տեղեկացված, թե որտեղ ինչ է արվում: Եվ այդ համայնքապետերն ընտրական նույն կեղծարարներ են, համենայնդեպս, նրանց ձեռքով է արվել ամեն ինչ, ուղղակի ինքն աչք է փակել այն ժամանակ, կամ էլ շատ լավ տեղյակ լինելով ամեն ինչից` իր շահն է կարևորել»,- MAMUL.am-ի թղթակցի հետ զրույցում, անդրադառնալով Տեղական ինքնակառավարման խորհրդաժողովի ժամանակ Սերժ Սարգսյանի` համայնքապատերին ուղղված պարսավանքի խոսքերին, կարծիք հայտնեց «Ազգային համաձանություն» կուսակցության նախագահ Արամ Հարությունյանը: «Այս ելույթն, իմ կարծիքով, ընդամենը նախընտրական շոու է` ցույց տալու համար, որ տեսեք` ես այդքան մտահոգ եմ և ուզում եմ ամեն ինչ դնել իր տեղը: Բայց, ես համոզված եմ, որ արդյունքում ոչինչ չի փոխվելու, որովհետև այդ գյուղապետերն ու համայնքապետերը հասկանում են, որ Սերժ Սարգսյանը տոկոս խփելուց պարտական է իրենց»,- շարունակեց Ա. Հարությունյանը` կարծիք հայտնելով, որ «Գելափի» հարցումների ֆոնի վրա փորձ է արվում ցույց տալու, որ ժողովուրդը Ս. Սարգսյանի հետ հույսեր է կապում: «Մինչդեռ ակնհայտ է, որ Հայաստանում բոլորը գիտեն` ով ինչով է զբաղված, ով ինչ եկամուտ ունի: Եվ Ս. Սարգսյանը մի դեպքում է վատ զգում, երբ որ իրեն գցում են ֆինանսապես: Հիմա, երևի, տեղ չեն հասել ինչ-որ բաներ... Թե տեղական մարմիններն ինչով են զբաղված, իրավապահները շատ լավ գիտեն` հասցնում են, էնպես որ, նա լավ գիտի, թե ում կարելի է դատել, ում` ոչ: Իսկ դրանք ընդամենը հերթապահ խոսքեր են, թեմա էր, որ պիտի բացեր և նպատակը, կրկնում եմ` ցույց տալ, թե Սերժ Սարգսյանը չգիտեր այդքան բան, կամ, եթե գիտեր էլ, այսուհետ շատ խիստ է լինելու, պատժելու է և այլն: Էն ինչը, որ ինքն ասում է, ասել է տարբեր առիթներով և ոչ մի նոր բան չկար...»,- ասաց մեր զրուցակիցը: Արամ Հարությունյանը հիշեց, որ Ս. Սարգսյանը իշխանության մեջ է եղել դեռևս 1993 թվականից և անցել բոլոր ոլորտներով: «Այնպես չէ, որ նա նոր է հայտնաբերում, թե ինչ է կատարվում: Ինչ էլ որ կատարվել է, ապա` իր գիտությամբ, և յուրայինները չեն պատժվել մինչև հիմա: Եթե պատժվել են` ապա մասնաբաժին չտալու համար, ինչպես եղավ Վազգեն Խաչիկյանի կամ Մարգար Օհանյանի դեպքում»,- եզրափակեց «Ազգային համաձայնության» կուսակցության նախագահը: |