Վրաստանի նախկին նախագահ, Օդեսայի նախկին նահանգապետ
Միխայիլ Սաակաշվիլին հրաժարվել է ինքնակամ ներկայանալ դատարան՝ Ուկրաինայում պետական հեղաշրջման փորձի գործով ցուցմունք տալու համար: Այս մասին հայտնում է «Украинская правда» թերթը՝ հղում անելով Սաակաշվիլիի ղեկավարած «Նոր ուժերի շարժում» կուսակցության մամուլի քարտուղար Մարիանա Պոչտարին:
«Որևէ փաստաթուղթ Սաակաշվիլին չի ստորագրել և չի ստացել: Ո՛չ նա, ո՛չ փաստաբանները: Նրան նույնիսկ կասկածանքի մասին ծանուցում չեն հանձնել»,- ասել է Պոչտարը: Նրա խոսքով՝ քաղաքական գործիչն այսօր Ուկրաինայի Գերագույն ռադայի շենքի դիմաց ճեպազրույց կանցկացնի, որի ժամանակ իրավաբանների հետ կքննարկի ստեղծված իրավիճակը:
Նախօրեին Ուկրաինայի գլխավոր դատախազ Յուրի Լուցենկոն Սաակաշվիլիին 24 ժամ էր տվել, որպեսզի վերջինն ինքնակամ ներկայանա դատարան: