ՌԴ արդարադատության նախարարությունն «Ամերիկայի ձայնը», «Ազատություն ռադիոկայան» և ևս յոթ լրատվամիջոց ներառել է արտասահմանյան գործակալների ցանկում: Արտասահմանյան ֆինանսավորում ունեցող ԶԼՄ-ներին նման կարգավիճակ շնորհելը հնարավոր է դարձել ՌԴ նախագահ Վլադիմիր Պուտինի ստորագրած հրամանագրի շնորհիվ:
Ռուսաստանի խորհրդարանի վերին պալատի աշխատակազմից РБК-ին հայտնել են, որ ենթադրվում է արգելել համապատասխան ցանկում հայտնված գործակալների մուտքը Դաշնային խորհուրդ:
Այս օրենքի ընդունումը դարձել է ԱՄՆ-ում ռուսական ԶԼՄ-ների նկատմամբ ճնշումների, մասնավորապես՝ RT American-ն օտարերկրյա գործակալ ճանաչելու քայլի պատասխանը:
Նշվում է, որ Օտարերկրյա գործակալի կարգավիճակ ստացած ԶԼՄ-ներից պահանջվելու է նշագրել իրենց տեղեկատվական նյութերը որպես «օտարերկրյա գործակալի» կողմից տարածվող արտադրանք և ներկայացնել հաշվետվություններ: