Խնդրում ենք սպասել...

Իրադարձություններ

Երբ դպրոցներում տարեսկզբից «վինետկա» են նկարվում, իսկ մանկապարտեզներում, «որպեսզի երեխաներն իրենց լավ զգան», պետք է վճարեն

13:30, երկուշաբթի, 04 դեկտեմբերի, 2017 թ.
Երբ դպրոցներում տարեսկզբից «վինետկա» են նկարվում, իսկ մանկապարտեզներում, «որպեսզի երեխաներն իրենց լավ զգան», պետք է վճարեն

Որքան էլ կրթության ոլորտի ջատագովները, հանձինս ԿԳՆ-ի և քաղաքապետարանի պաշտոնյաների, յուրաքանչյուր ուսումնական տարեսկզբին հայտարարում են, որ խիստ պայքար են տանելու հանրակրթական և նախադպրոցական հաստատություններում դրամահավաքության դեմ, բայց վերջինները, միևնույն է, հարմար առիթի դեպքում շարունակում են իրենց որդեգրած սկբունքներով ծնողից «պոկելու» քաղաքականությունը:
     Օրինակ, էլիտար որոշ դպրոցներում այլ մեթոդներով են գումարներ կորզում աշակերտներից: Որպես ավանդույթ նրանցից շատերը գործարքներ են կնքում մասնավոր ընկերությունների կամ անհատների հետ և աշակերտին ստիպում հենց այդ ծառայություններից օգտվել:
     Անչափ տարօրինակ է այն, որ դպրոցներում ավարտական դասարանների աշակերտներին ստիպում են դեռևս ուս-տարվա սկզբից վինետկայի համար նկարվել, երբ դեռ դպրոցն ավարտելուն բավականին ժամանակ կա, առնվազն մինչև մայիս: Ի դեպ, եթե մեկ-երկու տարի առաջ մեկ շրջանավարտը վինետկայի համար վճարում էր 2 500-3 000 դրամ, ապա այժմ` կրկնակի թանկ: Այն այսօր մեկ շրջանավարտի համար արժե 5000 դրամ: Համագործակցելով լուսանկարչական ծառայություններ իրականացնող ընկերությունների կամ անհատների հետ, դպրոցները, բնականաբար, ունեն իրենց շահույթը և վինետկայի նման բարձր գինը խոսում է այն մասին, որ գումարը երկուստեք է բաժանվում, այսպես ասած` գործարքն իրականցվում է 50/50 տարբերակով: Ի միջի այլոց, նշենք, որ հատկապես կենտրոնում գործող էլիտար կոչվող դպրոցներում ավարտական դասարաների թիվը հասնում է նույնիսկ մինչև 7-ի: Ընդ որում` այդ յոթ ավարտական դասարաններում աշակերտների թիվը տատանվում է 35-38-ի, շատ դեպքերում` նույնիսկ 40-ի միջև: Եթե փոքրիկ հաշվարկ կատարենք, թե արդունքում որքան գումար է կազմում միայն վինետկայի ստացված հասույթից, պատկերը պարզ կլինի:
     Թեպետ հանրակրթական և նախադպրոցական հաստատություններում վաղուց վերացած է «ֆոնդի փող» հասկացողությունը, բայց, միևնույն է, այսօր էլ շատ կրթօջախներում տարբեր անվան տակ գումարներ են հավաքում: Օրինակ, «Չորրորդ իշխանության» հրապարակումներից տեղեկանում ենք, որ մայրաքաղաքի տարբեր մանկապարտեզներում դրամահավաք է իրականացվում: Խոսքն, ըստ աղբյուրի, Դավիթաշեն վարչական շրջանի թիվ 61 մանկապարտեզի մասին է, երբ տնօրինությունը «Օգնիր մանկապարտեզիդ» հիմնադրամի անվան տակ 1000-ական դրամներ է հավաքել սաներից: Դրամը մանկապարտեզում պահանջում են առձեռն և ոչ հաշվեհամարին փոխանցելով։
     Գրեթե բոլոր մանկապարտեզներում ծնողները մի ուրիշ խնդրի առաջ էլ են կանգնում. երեխան պարտավոր է իր հետ մանկապարտեզ տանել ամենօրյա օգտագործման ամենատարրական պարագաները` զուգարանի թուղթ, սրբիչ, անկողին, սպասք, անձեռոցիկ, գրենական բազմապիսի պարագաներ...
     Այսպիսով, տպավորություն է ստեղծվում, թե փոքրիկներն անվճար մանկապարտեզ են հաճախում, սակայն, իրականում, նրանց ծնողներն ամենամսյա որոշակի գումարի հետ միասին տարբեր իրեր են տրամադրում մանկապարտեզներին։
     MAMUL.am-ի թղթակցի հետ զրույցում ծնողներից մեկը հավաստեց, որ մինչև նախորդ ամիսը, կայարանամերձ մանկապարտեզներից մեկը հաճախող իր թոռնիկի համար ինքն ամեն ամիս պարտադիր կարգով 500-ական դրամ էր տալիս։ «Մի քանի օր առաջ տնօրենը ժողով արեց և ասաց, որ այլևս գումարներ չեն հավաքվելու։ Իսկ հետո, դաստիարակը ծնողների հետ զրույցում ակնարկեց, որ թեև դրամահավաքը հանվել է, բայց եթե ուզում եք, որ ձեր երեխաներն այստեղ իրենց լավ զգան, որոշակի գումար վճարեք»։

8817 | 0
Facebook