Իրադարձություններ

«Նոր ծրագիր է, որտեղ ակտուալ թեմաներ են շոշափվում՝ ամանորյա հումորներից մինջև վերջերս մեր երկրում տեղի ունեցած իրադարձություններն, այդ թվում՝ քաղաքական»,- MAMUL.am-ի թղթակցի հետ զրույցում ասաց դերասան Հովհաննես Դավթյանն, ով դեկտեմբերի 16-ին և 17-ին Սունդուկյանի թատրոնում կներկայացնի իր նոր Stand up շոուն:
     «Ներկայացումը կոնկրետ վերնագիր չունի, քանի որ այն ավելի շատ Stand up շոու է` էկրանի և հանդիսատեսի անմիջական ու ակտիվ մասնակցությամբ»,- նշեց դերասանը:
     Հովհաննես Դավթյանը դեմ է վարկերով Նոր տարի նշելու գաղափարին, ինչի մասին ևս խոսելու է ներկայացման ժամանակ:
     «Կարծում եմ, որ դա սխալ է, ոչ ոքի ոչինչ պետք չէ ցուցադրել, ինչի հնարավորություն ունես, դրա սահմաններում էլ պետք է անես»,- ասում է դերասանն ու հավելում, որ Ամանորն իր սիրելի տոնն է և ամեն անգամ հետաքրքրությամբ է սպասում: «Հիմնականում դիմավորում եմ տանը, եթե գործնական հետաքրքրիր առաջարկներ չեն լինում և այդ օրն աշխատանքի չեմ լինում»:
     Հովհաննես Դավթյանը մաղթում է, որ 2018-ին խաղախություն լինի մեր երկրում, մի քիչ էլ ժպիտներ ու բարություն ավելանա մարդկանց դեմքին: