«ԱԺ-ում բյուջեի խնայողության նոր միջոցներ են մտածում: ԱԺ հեռախոսազանգերը լիմիտավորելուց հետո կարգավորման հաջորդ մեխանիզմը, որն այժմ քննարկվում է, վերաբերում է ավիատոմսերին: Քիչ չեն դեպքերը, երբ պատգամավորները վերջին պահին հրաժարվում են գործուղման մեկնելուց, սակայն նախապես ձեռք բերված ավիատոմսերը հետ վերադարձնելիս բյուջեն վնասներ է կրում: ԱԺ աշխատակազմը մտադիր է նման դեպքերում վնասի փոխհատուցումը գանձել պատգամավորի անձնական միջոցներից: Ի դեպ, ԱԺ պետծառայողների ատեստացիան, որի մասին երեկ հաղորդել էինք, վերաբերելու է վերջին 3 տարին ատեստացիա չանցած ծառայողներին, որոնք, ինչպես տեղեկացանք, 31 հոգի են: ԱԺ մոտ 600 հոգանոց աշխատակազմում պետական ծառայողներ են ընդամենը 222-ը, որոնք կամ 3 տարուց պակաս են աշխատել, կամ վերջին 3 տարում անցել են ատեստացիա: Ըստ հասարակայնության հետ կապերի վարչության պետ Արսեն Բաբայանի՝ ատեստացիան ԱԺ աշխատակիցների կրճատման նպատակ չի հետապնդում. «Ատեստացիան և կրճատումն իրարից տարբերվող ինստիտուտներ են, կրճատումն անվանացանկով և հաստիքացուցակով ԱԺ նախագահի կողմից ընդունվող փաստաթուղթ է, ըստ անհրաժեշտության՝ նա կարող է կատարել կրճատում կամ ավելացում: Մենք մշտապես ասել ենք, որ ԱԺ աշխատակազմը պետք է օպտիմալացվի, կարգավորվի և ունենա այնպիսի կառուցվածք և հաստիքացուցակ, որը կկարողանա արդյունավետ կառավարել օրենքով իր առաջ դրված պարտականությունները: Այս պահին շարունակվում է ԱԺ կառուցվածքային փոփոխությունների մշակման աշխատանքը, որը, սակայն, առնչություն չունի ատեստացիայի հետ»: Ի դեպ, ատեստացիոն հարցաշարը բաղկացած կլինի առնվազն 150 հարցից»,-գրում է թերթը:
Նյութն ամբողջությամբ կարդացեք թերթի այսօրվա համարում: