NASA-ն հրապարակել է տեսանյութ, որում պատկերավոր կերպով ցույց է տվել, թե ինչպես է փոխվել մեր մոլորակի կլիման վերջին 20 տարում: «Մենք կարծես լսում ենք Երկրի շնչառությունն, այն շնչում է ամեն օր, փոփոխվում տարիների հետ՝ ազդվելով Արևից, քամիներից, օվկիանոսային հոսանքներից և ջերմաստիճանից: Կախարդական է, որ մենք հնարավորություն ունենք տեղափոխվելու տիեզերք ու այնտեղից հետևելու այդ ամենին»,- ասել է օվկիանոսագետ Քարլ Ֆելդմանը:
Վերջին 20 տարում մեր մոլորակն զգալիորեն փոփոխվել է, գլոբալ տաքացման հետևանքները կարելի է տեսնել՝ հետևելով սառցադաշտերի ու Արկտիկայի ձյունե շերտի նվազեցմանը: Երևում է նաև, թե ինչպես է 2004-ին և 2015-ին տեղի ունեցած անտառային հրդեհների պատճառով Ալյասկայում ոչնչացվել միլիոնավոր ակր անտառ, կամ կլիմայի փոփոխությունների պատճառով ինչպես են փոխվում անտառների ծառատեսակները: «Ժամանակն է գործելու և էկոլոգիական խնդիրները լուծելու»: