Իրադարձություններ

Բանաստեղծ, արձակագիր, երգիչ-երգահան Վահրամ Թաթիկյան այսօր` նոյեմբերի 14-ին նշում է ծննդյան 68-ամյակը:
     Նա ծնվել է մտավորականների ընտանիքում, արձակագիր Շահեն Թաթիկյանի և արձակագիր, լրագրող Շաքե Վարսյանի որդին է: Սովորել է Երևանի պետական համալսարանի պատմության ֆակուլտետի հնագիտության բաժնում` մասնագիտանալով հայ արվեստի պատմության մեջ: Թաթիկյանն աշխատում է ՀՀ ԳԱԱ արվեստի ինստիտուտում: Հեղինակել է գորգագիտությանը նվիրված բազմաթիվ գիտական հոդվածներ և հրապարակումներ: Հեղինակել է նաև ավելի քան քսան գորգերի էսքիզներ, որոնք գործվել են ու պահվում են տարբեր հավաքածուներում: 1977-ից Հայաստանի գրողների միության անդամ է: Մասնակցել է Արցախյան շարժմանը, հեղինակել է նաև հարյուրավոր երգեր, լուսանկարներ: Հրատարակվել են նրա «Հայկական գորգարուեստ», «Քառասուն երգ կամ երկու համերգ ձեզ համար» գրքերը:

     Ամիսներ առաջ անդրադարձել էինք, որ Արագածոտնի մարզի Ոսկեվազ գյուղում ոչնչացվել էր Վահրամ Թաթիկյանի 40 տարվա վաղեմություն ունեցող այգին, որտեղ գրողն իր գրքերի մեծ մասն է հեղինակել: Արձակագիրը վստահ էր, որ այս միջադեպը քաղաքական ուժերի կողմից իրեն լռեցնելու հերթական փորձն էր:
     MAMUL.am-ի թղթակցի հետ զրույցում գրողը հույս էր հայտնել, որ այգին վերականգնելու հարցում որևէ աջակցություն կստանա համապատասխան մարմիններից: Սակայն գրողի հույսերն այդպես էլ մինչ օրս իրականություն չդարձան:
     «Օրեր կան, երբ փակված իմ մեջ,
     Իմ իսկ վերքերը քննելով,
     Խորհում եմ` թե կլինի՞ վերջ
     Այս ընդհանուր ցավին մեր խոր»,- գրում է Վահրամ Թաթիկյանը: