«Հանուն գիտության նախաձեռնության» անդամ Դավիթ Պետրոսյանը ԵՊՀ շենքի մոտ հայտարարեց, որ շարունակելու են դասադուլները, քանի որ ԱԺ հանձնաժողովի նոյեմբերի 10-ի քննարկումն իրենց չի բավարարել, բացի այդ, դատապարտում են ուշ ժամին անցկացված նիստը. «Շաբաթ, կիրակի օրերին փողոցով քայլելիս տարբեր մարդիկ են մոտեցել մեզ: Հայտնի մշակութային գործչի տեսա, ասաց՝ ջութակահար, թավջութակահար, դաշնակահար, եթե մեկ օր չնվագեն, էլ չեն նվագի ու բերեց Ռախմանինովի խոսքերից մեջբերումներ: Այնպես որ, մեր մտահոգությունները տեղին են ու հասարակության արձագանքը վկայում է այն մասին, որ մեր պահանջները հիմնավորված են: Կոչ ենք անում ուսանողներին, դասախոսներին, իրենց աջակցությունը հայտնել ու միանալ ուսանողական շարժմանը՝ հանուն մեկ ընդհանուր նպատակի»,- ասաց Պետրոսյանը: Վերջինները համաձայն չեն նաև կառավարության ներկայացուցիչների այն առաջարկներին, ըստ որի՝ օրենքի՝ երկրորդ ընթերցմամբ ընդունումից հետո ուսանողները կարող են առաջարկություններ ներկայացնել. «Ասում են՝ թող օրենքն, անցնի, հետ քննարկումներ կանենք, բացերն ուղղենք: Եթե բացեր ունի, ինչո՞ւ անցնի, հետո քննարկումներ արվեն, առավել ևս, որ գործողության մեջ է մտնում մայիսից»,- հավելեցին հավաքվածները:
«Այս օրերին շատ է խոսվում շարժման քաղաքականացված լինելու մասին, քանի որ ես Արարատ Միրզոյանի («Ելք» խմբակցության պատգամավոր) օգնականն եմ հանդիսանում: Այս ամեն ինչը տեղի է ունենում մարդկանց կողմից, ովքեր իրենց շեֆերի ասածներին հակառակվելու ընդունակություն չեն ունեցել: Մենք անկախ ենք ու որևէ հրահրումների, ուղղորդումների չենք ենթարկվում»,- հավելեց Վահան Կոստանյանը: