Միջազգային

     Մոսկվայի Բասմանի շրջանի դատարանը հեռակա կարգով ձերբակալել է փակված Չերկիզովսկի շուկայի նախկին սեփականատեր, ադրբեջանցի գործարար Թելման Իսմայիլովին, հաղորդում է «Интерфакс»-ը:
     «Դատարանը հեռակա կարգով ձերբակալել է նրան: Մոսկվայի քաղաքային դատարանը բողոքարկումը կդիտարկի նոյեմբերի 15-ին»,- ասել է նրա փաստաբան Մարինա Ռուսակովան:
     Իսմայիլովի դեմ մեղադրանք է առաջադրվել երկու սպանություն կազմակերպելու և զենքի անօրինական կիրառման համար: Գործարարի նկատմամբ միջազգային հետախուզում է հայտարարվել:
     Գործակալությունը նշում է, որ խոսքը 2016թ. մայիսին Մերձմոսկվայում տեղի ունեցած երկակի սպանության մասին է: Հանցագործության հետևանքով զոհվել էին առևտրային համալիրների սեփականատեր Վլադիմիր Սավկինն ու «Լյուբլինո մոթորս»-ի հիմնադիր Յուրի Բրիլյովը: Այդ գործով ձերբակալվել էր Իսմայիլովի եղբայրը՝ Ռաֆիկը, ում քննությունը հանցագործության կազմակերպիչ է համարում, ինչպես նաև ենթադրյալ մասնակից Մեհման Քերիմովը:
     2009թ. Մոսկվայի իշխանությունների որոշմամբ Թելման Իսմայիլովին պատականող շուկան փակվել և ապամոնտաժվել էր: Դրանից հետո ադրբեջանցի գործարարը ֆինանսական դժվարությունների էր բախվել, իսկ այս տարվա մարտին սնանկ ճանաչվել: