Այսօր վաղ առավոտից ԵՊՀ-ի ուսանողները հավաքվել են հաստատության բակում և «տարկետում» վանկարկելով կոչ են անում մասնաշենքերի ուսանողներին` միանալ իրենց պահանջին և ընդվզել տարկետման իրավունքի սահմանափակման դեմ: Դասադուլի մասնակիցներից մեկը
MAMUL.am լրատվականի թղթակցի հետ զրույցում ասաց, որ իրենց նպատակը ֆակուլտետներից հնարավորին շատ ուսանողներ ներգրավելն է: «Մեր նախաձեռնության այս պահի պահանջն այն է, որ նախարարությունները մեզ հետ քննարկման մեջ մտնեն և կարողանանք հանգել այնպիսի հայտարարի, որի արդյունքում ոչ մեկ չտուժի: Դասադուլի նպատակն է՝ ուշադրության արժանանալ նախարարությունների կողմից, ինչպես նաև ուսանողների մի մասը, ովքեր դեռ իրազեկ չեն, իրազեկվեն:
Մի քանի օր առաջ մենք շարժվել ենք նաև ԿԳ նախարարություն, բայց Լևոն Մկրտչյանը չի ցանկացել մեզ հետ հանդիպել: Մեզնից 4 հոգու կանչել են փոխնախարարի մոտ, բայց նա չի ուզել մամուլի ներկայությամբ քննարկում անել, նույնիսկ ասել է, որ բոլորը հեռախոսներն անջատենք: Արդյունքում մենք չենք կարողացել պայմանավորվել, որպեսզի հանրային մեծ քննարկում լինի: ՊՆ-ին էլ նամակ ենք գրել, բայց դեռ չեն պատասխանել»:
Հավաքվածներին էր մոտեցել նաև «Ժառանգություն» կուսակցության անդամ Դավիթ Սանասարյանը: «Ես ուրախանում եմ, որ ուսանողներն իրենց իրավունքները պաշտպանում են, հասկանում են խնդրի էությունը, բայց սրան զուգահեռ պետք է ուսանողները պահանջեն, որ համալսարաններում բարեփոխումներ լինեն: Թող ասեն, որ այս որակի կրթություն մեզ պետք չի, այն ինչ-որ կա, կրթություն չի»: