Մոտ օրերս Մոսկվան գործող պայմանագրի շրջանակներում զենքի նոր խմբաքանակ կմատակարարի Երևանին, իսկ նոր, արդեն ստորագրված 100 միլիոն դոլար արժողությամբ պայմանագրի իրականացումը կսկսվի միջպետական բոլոր համաձայնագրերի իրագործումից հետո: Այս մասին РИА Новости-ի հետ զրույցում ասել է ՀՀ նախագահ Սերժ Սարգսյանը:
«Մինչ այս տարվա ավարտը մենք կյանքի կկոչենք նախկին պայմանավորվածությունները: Մոտ օրերս մենք նոր մատակարարումների ենք սպասում, իսկ մինչ տարեվերջ մենք կփակենք նախկին պայմանագրի հետ եղած բոլոր հարցերը»,- ասել է Սարգսյանը:
Հիշեցնենք, որ 2015թ. Ռուսաստանի և Հայաստանի միջև կնքված պայմանագրով Ռուսաստանը 200 միլիոն դոլարի պետական արտահանման վարկ էր տրամադրել Հայաստանին, որով մեր երկիրը պետք է ռուսական արտադրության զինավառություններ ձեռք բերեր:
Իսկ ընթացիկ տարվա հոկտեմբերի 12-ին ՀՀ կառավարությունը հավանություն է տվել Ռուսաստանի կողմից Հայաստանին ռազմական նշանակության արտադրանքի մատակարարման ֆինանսավորման համար 100 միլիոն դոլարի պետական արտահանման վարկի տրամադրման նախագծին: Նախնական վճարումը պետք է կազմի պայմանագրի արժեքի առնվազն 10%-ը և իրականացվի՝ ի շահ լիազորված ռուսական կազմակերպությունների: Համաձայնագրում նշվում է, որ վարկը տրամադրվում է 15 տարվա մարման ժամկետով: Հայաստանը պետք է օգտվի վարկային միջոցներից 2018-2022թթ.: