Միջազգային

The Resort հյուրանոցն աշխարհում առաջինն ու միակն է իր տեսակի մեջ՝ նախատեսված գեր մարդկանց համար: Պատահական չէ, որ այն անվանում են մեծ չափերով մարդկանց ապաստան:

     Այն թաքնված է Կարիբյան ավազանի Էլեուտրա կղզում: Հյուրանոցն իր դռները բացել է 2 տարի առաջ և այժմ մեծ պահանջարկ է վայելում գեր մարդկանց շրջանում: Այստեղ հնարավոր չէ մուտք գործել, եթե հյուրի քաշը բավականին տպավորիչ չէ, և սա արվել է, որ մյուս հյուրերն իրենց անհարմար չզգան ու զերծ մնան աներես ու հանդիմանական հայացքներից: Այստեղ հանգստացողները խոստովանում են, որ երբեք ոչ մի լողափում իրենց այսքան հանգիստ և երջանիկ չեն զգացել, ինչպես այս հյուրանոցում, որտեղ բոլորն իրենց նման են:
     Հյուրանոցում ամեն ինչ նախատեսված է մեծ չափերով ու ծանր քաշով հյուրերի համար, անգամ զուգարանակոնքերն ու դռներն են հատուկ պատվերով պատրաստված: Հյուրանոցի սեփականատեր Ջեյմս Քինգը պատմել է, որ դրա գաղափարն իր մոտ ծագել է 14 տարի առաջ: Նա լողափերից մեկում ականատես է դարձել, թե ինչպես է մի գեր մարդ նստելով կոտրում լողափնյա աթոռը: Եվ կարծես քիչ էր, որ նրան բոլորն սկսել են ծաղրել, դեռ մի բան էլ ստիպել են վճարել 150 դոլար տուգանք:

Ի դեպ, The Resort-ն ընդունում է միայն կոլեկտիվ հայտեր, այստեղ հնարավոր չէ գալ միայնակ: «Առաջին ամիսներին մենք ընդունում էինք միայնակ հանգստացողներին, սակայն երբ նրանք գալիս էին, հարմարվում ու մի քանի օրից սկսում էին լիարժեք հաճույք ստանալ, գալիս էին նորերն, ու հարմարավետության զգացողությունն անհետանում էր: Այդ ժամանակ էլ որոշեցինք, որ լիարժեք երջանիկ ու անհոգ հանգստի համար մեզ մոտ պետք է գան խմբերով»,- ասել է հյուրանոցի տերը: