Իրադարձություններ

     ԱԺ այսօրվա նիստի ժամանակ «Ելք» խմբակցության ղեկավար Նիկոլ Փաշինյանը ներկայացրեց իրենց հեղինակած «Ձերբակալված ու կալանավորված անձանց պահելու մասին» օրինագիծը, որը գլխադասային հանձնաժողովի կողմից արաժանացել էր բացասական եզրակացության: «Մի շարք պաշտոնյաներ, այդ թվում՝ պատգամավորներն, առանց հատուկ թույլտվության անարգել մուտքի ու ելքի իրավունք ունեն ՔԿՀ-ներ: Ինչ է տեղի ունենում կիրառական պրակտիկայում: Շատ հաճախ այս իրավունքը սահմանափակվում է, երբ քննիչի կողմից դրված է տեսակցությունների սահմանափակման որոշում, այսինքն՝ օրենքի դրույթի կիրառական նշանակությունը չի իրականացվում: Օրինակ, ընտրողը զանգում է պատգամավորին, ասում՝ ամուսինս ՔԿՀ-ում է ու տեղեկություններ ունեմ, որ եղունգները քաշել են: Պատգամավորը գնում է ՔԿՀ, ասում է՝ եկել եմ ահազանգի հետևից և ուզում եմ տեսնել՝ կալանավորվածի մատները տե՞ղն են, թե՞ չէ: ՔԿՀ-ն արգելում է՝ նշելով, որ քննիչն արգելել է տեսակցությունը: Մենք ասում ենք՝ ուզում ենք տեսնել ի վերջո խոշտանգե՞լ են, թե՞ ոչ, մատները կտրա՞ծ են, թե՞ ոչ, կենդա՞նի է, թե՞ ոչ: Արգելքն աբսուրդ է ու պետք է վերացնել»,- նշեց պատգամավորը: «Կիմաստազրկվի քննիչի կողմից սահմանափակումներ դնելու ինստիտուտն ու նախաքննության գաղտինության ապահովումն՝ ով ուզում է լինի»,- արձագանքեց հանրապետական պատգամավոր, արդարադատության նախկին նախարար Հրայր Թովմասյանը:
     Ձայների 35 կողմ, 51 դեմ հարաբերակցությամբ նախագիծը չընդգրկվեց 6-րդ գումարման 2-րդ նստաշրջանի օրակարգում: