Գերագույն ռադայի շենքի դիմաց ցույցերը կշարունակվեն մինչև նոյեմբերի 7-ը: Այս մասին հայտարարել է Վրաստանի նախկին նախագահ, Օդեսայի նախկին նահանգապետ Միխայիլ Սաակաշվիլին, հաղորդում է newsone.ua-ն: Նրա խոսքով՝ հաջորդ 2 շաբաթվա ընթացքում Սահմանադրության հրապարակում սեմինարներ, քննարկումներ կանցկացվեն:
«Հաջորդ շաբաթների ընթացքում մենք պետք է վերակառուցենք այդ հարապարակը և դարձնենք հանգիստ, հզոր, անվտանգ վայր»,- նշել է Սաակաշվիլին:
Բացի այդ, նա հայտարարել է ուկրաինական մի շարք քաղաքներ այցելելու մտադրության մասին, որպեսզի բոլորին հասցնի իր տեսլականն այն մասին, թե ինչ է կատարվում երկրում և իրավիճակի բարելավման առաջարկներ անի:
Ռադայի շենքի դիմաց ցույցերն սկսվել են հոկտեմբերի 17-ին: Ցույցի մասնակիցները պահանջում են ընդունել պատգամավորական անձեռնմխելիության չեղարկման մասին օրենքը, հակակոռուպցիոն դատարան ստեղծել և փոփոխել ընտրական օրենսդրությունը: