ԱՄՆ Սենատում խոսել են Արցախում նոր պատերազմի հավանականության մասին
15:40, հինգշաբթի, 19 հոկտեմբերի, 2017 թ.
 Ճեպազրույցին մասնակցել են Եվրոպայում անվտանգության և համագործակցության հանձնաժողովը, հայտնի որպես՝ «Հելսինկյան հանձնաժողով», Եվրոպայում և Կենտրոնական Ասիայում միջազգային ճգնաժամային խմբի տնօրեն Մագդալենա Գրոնոն, Մինսկի խմբի ամերիկացի նախկին համանախագահ (1999-2001թթ.) Քերի Քավանոն, Մինսկի խմբի ամերիկացի նախկին համանախագահ (2013-2016թթ.) Ջեյմս Ուորլիքն ու այլք: Գրոնոն, անդրադառնալով 2016թ. ապրիլյան պատերազմի թեմային, նշել է, որ անհրաժեշտ է դասեր քաղել այդ փաստից: Նրա խոսքով՝ ապրիլյան պատերազմը ցույց է տվել, որ հակամարտությունը կարող է վերսկսվել ցանկացած պահի: Միևնույն ժամանակ, նա ողջունել է ԵԱՀԿ Մինսկի խմբի նախաձեռնությամբ հոկտեմբերի 16-ին Ժնևում Հայաստանի և Ադրբեջանի նախագահների միջև կայացած հանդիպումը: Քերի Քավանոն, իր հերթին, նշել է, որ արցախյան հակամարտությունն արդեն վաղուց «սառեցված» չէ: Նրա խոսքով՝ մարտական գործողությունների վերսկսումը նվազագույնի հասցնելու համար անհրաժեշտ է իրականացնել ավելի վաղ ձեռքբերված համաձայնությունները: Միևնույն ժամանակ, Ջեյմս Ուորլիքը նշել է, որ Հայաստանի և Ադրբեջանի իշխանությունները պետք է քայլեր ձեռնարկեն լարվածությունը թուլացնելու և բանակցությունների համար լավ մթնոլորտ ապահովելու համար: «Նրանք պետք է իրենց ժողովուրդներին խաղաղությանը նախապատրաստեն: Նրանք պետք է միասին աշխատեն երկարաժամկետ խաղաղությունն ապահովելու համար»,- ընդգծել է Ուորլիքը: |
6673 | 0
