Կրթության փորձագետ Սերոբ Խաչատրյանն այսօր լրագրողների հետ զրույցում անդրադառնալով վերջին օրերին մանկապարտեզների շուրջ ստեղծված խնդրին, նշեց, որ հարցն իսկապես շատ լուրջ է: «Մեր երկրում 0-6 տարեկան երեխաների միայն 30%-ն է մանկապարտեզ հաճախում, իսկ 3-6 տարեկանների` 51%-ը: Սա շատ ցածր ցուցանիշ է»,- նշեց փորձագետը:
Սերոբ Խաչատրյանի խոսքով` պատճառն այն է, որ տարիներ առաջ մանկապարտեզներ փակվեցին, շենքերը վաճառվեցին, իսկ հետո, երբ պետական ու անվճար դարձան դրանք, բոլորը ցանկացան, որ իրենց երեխան մանկապարտեզ հաճախի: «Հիմա էլ հերթեր են գոյացել, քանի որ մանկապարտեզների թիվը քիչ է»,- նշեց փորձագետը: Նրա գնահատմամբ` այսօր մանկապարտեզ ընդունվելն ավելի դժվար է դարձել, քան՝ համալսարան:
«Եթե երեխային ուզում ենք սովորող դարձնել, պետք է շեշտը ոչ թե ավագ դպրոցի վրա դնել, այլ` մանկապարտեզների»,- ամփոփեց նա: