Այսօր՝ օգոստոսի 19-ին, Հայաստանի քննչական կոմիտեի Զինվորական քննչական վարչության 6-րդ կայազորային քննչական բաժնի քննիչը միջնորդություն է ներկայացնելու Տավուշի մարզի ընդհանուր իրավասության դատարան, որպեսզի դատարանը՝ որպես խափանման միջոց, երկամսյա կալանքի որոշում կայացնի Տավուշի մարզի Ներքին Կարմիրաղբյուր գյուղի բնակիչ՝ 37-ամյա Արթուր Լալայանի նկատմամբ։ Ինչպես հայտնում է
Shamshyan.com-ը, վերջինս, ով պայմանագրային զինծառայող է, կասկածվում է իր ծառայակից, համագյուղացի, 32-ամյա Վարդան Գրիգորյանին առանձնակի դաժանությամբ սպանելու և դին այրելու մեջ։ Ֆոտոլրագրողի տեղեկություններով՝ ոստիկանների ու քննիչների կատարած աշխատանքի արդյունքում պարզվել է, որ սպանությունը կապ չունի նրանց ծառայության հետ։ Այն առնչվում է անձնական խնդրին։ Փաստի առթիվ ՀՀ քր.օր-ի 104 հոդվածի 1-ին մասով հարուցվել է քրեական գործ։ Աղբյուրի տեղեկություններով՝ կասկածյալն արդեն տեղափոխվել է Ռազմական Ոստիկանության Իջևանի մեկուսարան, որտեղից նրան տեղափոխելու են դատարան, որտեղ դռնփակ դատական նիստը լինելու է, և եթե դատարանը բավարարեց քննչական մարմնի միջնորդությունը, ապա Ա. Լալայանը կկալանավորվի ու կտեղափոխվի բանտ։
Ինչպես
ավելի վաղ հայտնել էինք, որ օգոստոսի 17-ին Տավուշի մարզում ավտոմեքենայի մեջ մոխրացած տղամարդու դի էր հայտնաբերվել: