Նժդեհը կասեր՝ «հայի տականքն անմրցելի է». մարտական փամփուշտի անցքեր՝ Նժդեհի արձանի վրա
 Գեղամ Օհանյան օգտատերը գրառում է կատարել ֆեյսբուքյան իր էջում, որտեղ նշում է, որ Սյունիքի մարզի Խուստուփ լեռան գագաթից ներքև՝ քարայրի մոտ, որտեղ գտնվում է Գարեգին Նժդեհի կիսանդրին, վերջերս նկատել է, որ արձանի վրա մարտական փամփուշտի անցքեր կան բացված: Տեղում գտնվողներից մեկը նրան պատմել է, որ սա չորրորդ անգամն է կրկնվում: «Առաջինը եղել է 2002 թվականին, երկրորդը՝ 2004 թվականին, երրորդը՝ 2009-ին և արդեն ութ տարի է նման դեպք չէր գրանցվել, և, ահա՛, այս անգամ արդեն մարտական փամփուշտներով: Մի քանի վարկածներ կան, թե ովքեր կարող են լինել այդ փամփուշտների հեղինակները: Դա կարող էր անել որսորդների մի խումբ, գինովցած, առանց հասկանալու հուշարձանի կարևորությունը, անծանոթ լինելով Նժդեհի կյանքին ու գործին՝ անկիրթ ու բարոյազուրկ կյանք վարող մարդիկ: Կարող էին անել տեղացի կամ ոչ տեղացի հականժդեհականներ, որոնք իրենց համոզմունքներում հստակ նշում են, որ Նժդեհը դավաճան էր: Երրորդ տարբերակը քիչ հավանական է, բայց ոչ բացառելի: Գուցե ինչ-որ թշնամական երկրից պատվերի արդյունք է, որը մեծ հաճույքով իրականացնում են նրանք, ովքեր պատրաստ են վաճառել անգամ սեփական մորը: Օտարերկրացիների դեպքը բացառում եմ, քանի որ ոչ մի այլազգի չէր կարողանա զենքով հայտնվել Սյունիքի սրտում՝ սահմանից շատ հեռու և առանց տեղացի ուղեկցորդի: Ամեն դեպքում, եթե իրականացնողի ձեռքը ընկնի այս հոդվածը, թող տեղեկանա, որ շուտով դիմացի ժայռին, այնպիսի տեղ, որ իր ավտոմեքենան հաստատ չի հասնի, արևային մարտկոցով տեսախցիկ է տեղադրվելու: Էլ չենք պատրաստվում սպասել Օպերային թատրոնում շոգեբաղնիք կառուցող մշակույթի նախարարներին կամ Հանրապետական կուսակցությանը, որն իբր նժդեհյան գաղափարների վրա է կառուցել իր գաղափարախոսությունը, բայց վարվում է ճիշտ հակառակ: |
