«ԱԻՆ-ը պետք է լրջորեն մտածի վերազինման մասին. բահերով հրդեհ մարելու հույս ունենալն անլուրջ կառավարում է». Լենա Նազարյան
10:35, ուրբաթ, 18 օգոստոսի, 2017 թ.
Ինչպես արդեն հայտնել էինք, ԱԺ «Ելք» խմբակցության պատգամավորները երեկ այցելել էին Խոսրովի արգելոց՝ տեղում իրավիճակին ծանոթանալու համար: Լենա Նազարյանը ֆեյսբուքյան իր էջում մանրամասներ է հայտնում այցից՝ կցելով լուսանկարներ: «Ներկայացնում եմ պաշտոնական տվյալներ. «Անտառային պետական մոնիտորինգի կենտրոն»-ի (պարզվում է նրանք կան) արբանյակային պատկերների միջոցով արված հաշվարկի համաձայն, օգոստոսի 13-ի, ժամը՝ 7.30-ի տվյալներով արգելոցի տարածքում այրվել է 683.7 հա տարածք: Արտավան տարածքում (Վայոց Ձորի մարզ, արգելոցի տարածքից դուրս) այրվել է 610 հա տարածք: Քանի որ հրդեհը շարունակվել է նաև օգոստոսի 14 և 15-ին, ապա նշված թվերը կմեծանան: Նոր տվյալների մասին տեղեկություն կստանամ օգոստոսի 23-ին: Այս պահին հրդեհը մարված է: Կային ծխացող ծառերի բներ, բայց դրանք վտանգավոր չէին, քանի որ, միևնույն է, այդ բների շուրջն արդեն այրված էր: Այրվել են հիմնականում գիհու ծառերը, որոնք մի քանի հարյուր տարեկան էին և արգելոցի ամենաարժեքավոր ծառատեսակներից էին: Ըստ էության, այս արգելոցը գիհու անտառներով է հայտնի և արժեքավոր: Այն բոլոր տեղերում, որտեղ կրակը հասել է, գիհու ծառերը ծայրից ծայր արվել են: Մասնագետներն ասում էին, որ հենց դա է արգելոցի անդառնալի կորուստը, որովհետև եթե լայնատերև ծառերը կվերականգնվեն շատ արագ, գիհու դեպքում, եթե երբևէ նոր աճ սկսվի, ապա դա կտևի տասնամյակներ: Դա էլ այն դեպքում, եթե սերմերը խորը հողի տակ մնացած լինեն և սկսեն աճել: Այրված բնից նոր ճյուղեր չեն աճի, որովհետև այդ ծառը լուցկու պես է այրվել՝ ծայրից ծայր: Տնկել չի կարելի, որովհետև արգելոց է ու մարդու միջամտությունն արգելվում է: Լայնատերև ծառերը քիչ էին այրվել, հնարավոր է, որ որոշները գարնանը վերականգնվեն: Ասում են, որ խոշոր կենդանիները (արջ, ընձառյուծ, վայրի խոզ, կատվազգի կենդանիներ) չեն տուժել, բայց մանր կենդանիները, միջատներն ու սողունները, բնականաբար, արագ հեռանալ չէին կարող: Թեև արգելոցի, արտակարգ իրավիճակների ու բնապահպանության նախարարությունների աշխատակիցներն ամեն ինչ արել են, որ կանխեն հրդեհի տարածումը, բայց իրավիճակն այնպիսին է եղել, որ գերմարդկային ուժեր էին պետք հրդեհը հանգցնելու համար: Համապատասխան տեխնիկա չի եղել: Արգելոցն ուներ մի հրդեհաշիջման մեքենա, որը կարող էր եղած ճանապարհներով ջուր հասցնել սարերում բահերով աշխատող մարդկանց, բայց պարզվել է, որ սարքին չի: Իսկ ԱԻՆ-ի հրդեհաշիջման մեքենաներն էկոտուրզիմի համար նախատեսված կածաններով, բնականաբար, չէին կարող անցնել: Ինքնաթիռի աշխատանքը վճռորոշ է եղել՝ հրդեհի տարածումը կանխելու համար: ԱԻՆ-ը պետք է լրջորեն մտածի վերազինման մասին, քանի որ կլիման փոխվում է, լեռնային երկրում չոր եղանակների ժամանակ նման դեպքերն անխուսափելի են ու բահերով հրդեհ մարելու հույս ունենալն անլուրջ կառավարում է: Գոնե փոքր ինքնաթիռ ունենալն ուղղակի կենսական անհրաժեշտություն է:» |
Աղբյուրը` Լենա Նազարյան («Ֆեյսբուք»)
6086 | 0