«Հայաստանն Ուկրաինայի օրինակով կարող է թշնամի պետություն դառնալ Ռուսաստանի համար». Սերգեյ Մարկով
 Ռուսաստանի քաղաքական հետազոտությունների ինստիտուտի տնօրեն Սերգեյ Մարկովը Vestikavkaza պարբերականի հետ զրույցում պատմել է Հայաստանում վերջին շրջանում տիրող հակառուսական տրամադրությունների մասին: «Մենք վաղուց նկատում ենք, որ Հայաստանի իշխանությունները բավարար միջոցներ չեն ձեռնարկում հակառուսական քարոզարշավի ֆինանսավորումը ճնշելու համար և նյութական հիմք են ստեղծում հակառուսական քաղաքականության համար՝ փառաբանելով նացիստական այնպիսի միջնորդների, ինչպիսին է Գարեգին Նժդեհը: Մենք տեսնում ենք, որ Հայաստանում Ռուսաստանի հանդեպ առավելագույն և սեփական երկրի հանդեպ նվազագույն պահանջկոտություն կա»,- ասել է Մարկովը: Քաղաքագետն ընդգծել է, որ այդ խնդիրն անհրաժեշտ է առավել մեծ ուշադրություն հատկացնել, քան նախկինում: Մարկովը մեկնաբանել է օրերս «Ժամանակը ցույց կտա» հաղորդման եթերում քաղաքագետ և արևելագետ Կարինե Գևորգյանի հայտարարությունն այն մասին, որ Հայաստանում հակառուսական տրամադրությունները ճգնաժամային են, և որ Հայաստանն արդեն Ուկրաինայի ճանապարհով է գնում: «Ինձ համար այդ հայտարարությունն անսպասելի էր: Կարծում եմ, որ անհրաժեշտ է առավել մեծ ուշադրություն հատկացնել այդ հարցին և հասկանալ, թե որքան հեռուն է գնացել այդ իրավիճակը»,- ասել է Մարկովը՝ հավելելով, որ Հայաստանի համար Ուկրաինայի ուղին ռիսկային է: «Ռիսկերը բավականին լուրջ են. կա՛մ «մայդան», կա՛մ հայկական կառավարության էվոլյուցիա: Դա կարող է հանգեցնել Եվրասիական տնտեսական միությունից Հայաստանի դուրսբերմանն ու ՆԱՏՕ-ի հետ ռազմական համագործակցության ընդլայնմանը: Հայաստանը կարող է Ուկրաինայի կամ Մերձբալթիկայի և Մոլդովայի օրինակով Ռուսաստանի համար ևս մեկ թշնամական պետություն դառնալ»,- հավելել է ռուս քաղաքագետը: |
