Իրադարձություններ

«Սասնա ծռեր» խմբի անդամներից Վարդան Գերավետյանն արդեն 16-րդ օրն է` հացադուլի մեջ է: Նրա պաշտպան Դավիթ Գյուրջյանը MAMUL.am-ի թղթակցի հետ զրույցում տեղեկացրեց, որ իր պաշտպանը շատ է հյուծվել: «Շատ հյուծված տեսք ունի, բոլոր հորդորները, որ դադարեցնի հացադուլն, անտեսում է: Այլ մանրամասներ այս պահին չեմ կարող ասել»,- ասաց պաշտպանը: Ավելի վաղ տեղեկացրել էինք, որ խմբի անդամ Վարդան Գերավետյանը հուլիսի 22-ից հացադուլ է հայտարարել, նրան է միացել խմբի անդամներից Տիգրան Մանուկյանը: Նշենք, որ Ժիրայր Սեֆիլյանը և Վարուժան Ավետիսյանը հորդորել էին դադարեցնել հացադուլը:
     Հացադուլ իրականացնողները ներկայացրել են չորս պահանջ, մասնավորապես` ճանաչել որպես քաղբանտարկյալներ «Սասնա ծռեր» խմբի անդամներին և նույն գործով կալանավորված անձանց, ինչպես նաև Կարո Եղնուկյանին, Անդրիաս Ղուկասյանին, Գևորգ Սաֆարյանին, Հայկ Կյուրեղյանին, Շանթ Հարությունյանին և նրա խմբի տղաներին, «Սասնա ծռերի» շրջանակներում կալանավորված ցուցարարներին, Սարի թաղի կալանավորված բնակիչներին և «բոլոր այն անձանց, ովքեր կալանավորված են ներկայիս ազգակործան ռեժիմի կողմից իրենց քաղաքական և քաղաքացիական դիրքորոշման համար»։