Բրյուսելը մտավախություններ ունի, որ ԱՄՆ կողմից սահմանված հակառուսական նոր պատժամիջոցների հետևանքով հարվածի տակ կհայտնվեն եվրոպական էներգետիկ և այլ կազմակերպություններ: Այդ իսկ պատճառով Եվրոհանձնաժողովի ղեկավար Ժան Կլոդ Յունկերը հորդորել է անհապաղ քայլեր ձեռնակել, եթե ԱՄՆ-ն առանց Եվրոմիության նկատողությունները հաշվի առնելու նոր պատժամիջոցներ սահմանի Ռուսաստանի հանդեպ: Այս մասին հաղորդում է Financial Times լրատվականը:
Եվրոհանձնաժողովի նիստը կկայանա հուլիսի 26-ին: Լրատվականի տրամադրության տակ հայտնված փաստաթղթում պատասխանների մի քանի տարբերակ է առաջարկվում, մասնավորապես, ԱՄՆ նախագահ Դոնալդ Թրամփը պետք է հստակ հավաստիացումներ ներկայացնի` բանավոր կամ գրավոր, որ պատժամիջոցները չեն ազդի Եվրոմիության երկրների շահերին: