Գերմանիայի կառավարությունը ծրագրում է սառեցնել Թուրքիային զենքի մատակարարման ծրագիրը, հաղորդում է գերմանական Bild պարբերականը` հղում անելով կառավարական իր աղբյուրներին:
«Անհրաժեշտ է ոչ միայն վերանայել Թուրքիայի արտահանման երաշխիքներն, այլև հստակորեն հայտարարել, որ արտահանում այլևս չի լինելու»,- Բունդեսթագի փոխխոսնակ, «Միություն 90/Կանաչներ» կուսակցության ներկայացուցիչ Կլաուդիա Ռոթի խոսքերն է մեջբերում լրատվականը:
Նրա խոսքով` մատակարարումներն անհապաղ պետք է դադարեցվեն տարածաշրջանում զինված հակամարտության պատճառով:
Փոխխոսնակը պարզաբանել է, որ երկու երկրների միջև հարաբերությունները լարվել են ոչ միայն Գերմանիայի, այլև առավելապես` Թուրքիայի նախագահ Էրդողանի պատճառով:
Նշենք, որ նախօրեին Գերմանիայի արտգործնախարար Զիգմար Գաբրիելը հայտարարել է, որ Բեռլինը մտադիր է վերանայել Թուրքիայի հանդեպ տնտեսական սահմանափակումների հարցը` այդ երկրում գերմանացի իրավապաշտպանների կալանավորման հետ կապված:
Հիշեցնենք, որ ավելի վաղ Գերմանիայի կանցլեր Անգելա Մերկելը հայտարարել էր, որ անհրաժեշտ է առավել կոշտ քաղաքականություն վարել ընդդեմ Թուրքիայի։