Վերջին օրերին համացանցում ակտիվ տարածվում է այն տեղեկությունը, որ Կարեն Դեմիրճյանի անվան Երևանի մետրոպոլիտենում ուղեվարձի սահմանման մեջ որոշակի փոփոխություններ են մտցվել: Նշվում է, որ այն մարդիկ, ովքեր մետրոյից օգտվում են հեծանվով կամ մեծ ուղեբեռով, պետք է ևս մեկ ժետոն գնեն: Օրինակ, եթե ուղեբեռի երկարության, լայնության և բարձրության չափերի հանրագումարը գերազանցում է 120 սմ-ն և 150 սմ-ից ավելի երկարություն ունեցող առարկան, ապա պետք է վճարել կրկնակի:
Մետրոպոլիտենից պարզաբանում են, որ սա նոր բան չէ, բայց այն հասարակության մեջ քննարկման առարկա է դարձել:
Կարեն Դեմիրճյանի անվան Երևանի մետրոպոլիտենի մամուլի քարտուղար Նինել Վարդանյանը
MAMUL.am լրատվականի թղթակցի հետ զրույցում ասաց, որ այս կարգը գործում է արդեն մի քանի տարի: «Մեծ հեծանիվները, երբ անցկացնում են, մինչև վերջ չեն հասցնում և կեսից երկաթները փակվում են, այդ պատճառով երկու ժետոն են օգտագործում: Նույնն էլ մեծ պայուսակների դեպքում: Մեր հիմնական օգտվողները սա շատ լավ գիտեն»: