Հետաքրքիր է

ԱՄՆ Փենսիլվանիա նահանգում 19-րդ դարում կառուցված փոքրիկ Սենթրեյլիա քաղաքն այժմ լքված է ու պատված բուսականությամբ: 1981-ին մոտ 1000 բնակիչ ունեցող քաղաքում այժմ 7 մարդ է ապրում: Պատճառը ստորգետնյա չմարող հրդեհներն են, որոնց առաջացրած ծխից ու առողջության վրա ունեցած դրա վատ հետևանքներից բնակիչները տարհանվել են հարևան բնակավայրեր:
     Քաղաքի ստորգետնյա հրդեհն սկսվել է 1962-ի մայիսին:

Առաջիկա տոնի կապակցությամբ քաղաքի իշխանությունը պատվիրել է հրկիզել մոտակայքի աղբանոցում կուտակված աղբը: Սովորականի նման աղբահավաքները հրկիզել են այն ու սպասել մի քանի օր, որից հետո հանգցրել են: Սակայն կրակը պատշաճ չի մարվել, արդյունքում ստորգետնյա անցքերով այն հասել է լքված ածխահանքի հորերից մեկին ու տարածվել: Ժամանակի ընթացքում կրակը հասել է քաղաքի տակ ու շուրջը գտնվող բոլոր հանքահորերին, այն մարելը գործնականում դարձել է անհնար: 1984 թվականին ԱՄՆ Կոնգրեսը 42 միլիոն գումար է հատկացրել քաղաքացիների վերաբնակեցման համար: 2002-ին ԱՄՆ փոստային ծառայությունը չեղարկել է քաղաքի փոստային ինդեքսը:

Այսօր Սենթրեյլիայում քանդվել են գրեթե բոլոր շինությունները: Այն նմանվել է մի մեծ մարգագետնի՝ ավերված ճանապարհներով, որոնց հսկայական ճաքերից ծուխ է դուրս գալիս:

Այժմ ոչ մի փորձ չի արվում կրակը մարելու, իսկ քաղաքի ընդերքում ածխի պաշարները կբավականացնեն, որ հրդեհը շարունակվի դեռ 250 տարի: