Մարդու իրավունքների պաշտպան Արման Թաթոյանը լրագրողների հետ զրույցում կարծիք է հայտնել, որ չնայած նրան, որ ՄԻՊ բողոքների հիմնական մասը ոստիկանների դեմ է, սակայն դա չի նշանակում, որ ամենաշատը մարդու իրավունքները խախտողները ոստիկաններն են:
Դիտարկմանը, թե Լևոն Երանոսյանը ակտիվ էր հուլիսյան և Բաղրամյանի դեպքերի ժամանակ, մինչդեռ որևէ պատասխանատվության չկրեց, Արման Թաթոյանը պատասխանել է, որ դրանք հարցեր են, որոնց պատասխանը պետք է տա քննությունը:
Հարցին, թե ինչպես է վերաբերվում այն կարծիքներին, թե ՄԻՊ-ը կախվածություն ունի իշխանավորություններից և իր ելույթները համաձայնեցնում է իշխանության հետ, Թաթոյանը պատասխանել է, որ նման բան չի կարող լինել, քանի որ ինքն անկախ է իր պարտականությունները կատարելիս. «Մի հատ հուլիսյան իրադարձությունների վերաբերյալ զեկույցը վերցրեք կարդացեք: Դրանք գնահատականներ են, որ ամենայն խստությամբ տրված են: Ոստիկանության վերաբերյալ հստակ նշված է, որ ունեցել են լրագրողներին պատժելու նպատակ: Լիարժեք ներկայացված է, որ ոստիկանության ծառայողները որոնք շփվում են քաղաքացիների հետ չեն տիրապետում իրենց լիազորությունների դրա համար չեն ապահվում անձի իրավունքները: Սրանք բոլորն իմ զեկույցում նշված են, դուք խոսում եք կախվածութա՞ն մասին»,- նշել է Թաթոյանը: