Հայաստանի «արդարադատության» նկատմամբ հասարակության անվստահությունն ակնհայտ իրողություն է: Նույնիսկ արտագաղթի պատճառների մեջ հազիվ թե առաջին տեղերից մեկում արդարադատության բացակայությունը չէ, կամ, շատ մեղմ ասած՝ անվստահությունը: Այնքան ակնհայտ իրողություն է, որ նույնիսկ երկրի նախագահի պաշտոնն զբաղեցնողն է քանիցս ասել, որ արմատապես պետք է փոխել այդ համակարգում առկա անարդարությունների ծավալը՝ ուղղակիորեն ընդունելով արդարադատության կաղությունը: Բայց այդ անարդար արդարադատության նկատմամբ այնպիսի արտաքին, ցուցադրական հարգանք են պահանջում, ինչպես անարդար դատվողների կողմից անարդար դատողին հոտնկայս դիմավորելը: Բռնի ուժով: Այսինքն բառի բուն իմաստով ֆիզիկական ուժով կանգնեցնել և հարգանք ցուցադրել, հակառակ դեպքում՝
ֆիզիկական ուժով դուրս տանել դատարանի դահլիճից, ինչպես այսօր արվեց Շենգավիթի դատարանում Ժիրայր Սեֆիլյանի նկատմամբ: Անարդար դատարանում անարդար դատավորի անարդար դատը պետք է ընթանա անարդար դատվողի ակնածալի հարգանքի ցուցադրությամբ: Երեկ Արմավիրի ՔԿՀ-ում մերժել են Ժիրայր Սեֆիլյանին փոխանցել պատմական աշխարհագրության մի քարտեզ՝ հղում անելով Սահմանադրությանը և խախտելով Սահմանադրությունը, այսօր նրանից պահանջել են ակնածալի հարգանք անարդար դատարանի նկատմամբ: Պե՞տք է արդյոք դատավորին, դատարանին, հասարակությանը, պետությանը, երկրին այս կեղծ հարգանքի ցուցադրությունը մի մարմնի նկատմամբ, որին ապացույցներ պետք չեն որոշ մարդկանց դատելու համար (
Խանդոյանի նկատմամբ այսօր ընդունված վճիռը), իսկ այլոց հանցագործությունների մասին ապացույցները հիմք չեն նրանց չէ թե դատելու, գոնե գործին կցելու համար, որը Հայաստանում մեր հասարակության ու քաղաքացիների կողմից հաճախ աղետալի է ընկալվում, որից քաղաքացիները սարսափում են, որի վճիռներով մարդկանց անարդարացիորեն դուրս են շպրտում իրենց տներից և դրանք հատկացվում են ուրիշներին, որը իրական հանցագործներին ոչ մի խոշորացույցով չի տեսնում, բայց կարող է հանցագործներ ստեղծել դատարկ տեղը: