Իրաքի վարչապետ Հայդեր ալ Աբադին հայտարարել է, որ առաջիկա օրերին արդեն կարելի կլինի հայտարարել Մոսուլի վերջնական ազատագրման մասին:
«Դա ընդամենը մի քանի օրվա հարց է, և մենք կհայտարարենք Մոսուլի ազատագրման մասին», - ասել է Ալ Աբադին Al Samuria հեռուստաընկերությանը տված հարցազրույցում․ այս մասին փոխանցում է РИА Новости գործակալությունը։
Վարչապետը նշել է, որ իրենք անհապաղ պատրաստվում են ձեռնամուխ լինել ԴԱԻՇ ահաբեկչական խմբավորման զինյալների կողմից ավերված մի շարք պատմական հուշարձաներրի վերականգնման աշխատանքներին:
Նախատեսվում է վերակառուցել Նեմրութ և Խաթրա (Էլ Խադր) հնագույն քաղաքները, ինչպես նաև Մոսուլի հայտնի ան Նուրի մզկիթի ալ Խադբա մինարեթը, որը ԴԱԻՇ գրոհայինները պայթեցրել էին վերջերս:
Մոսուլը ԴԱԻՇ-ի գրոհայինների հսկողության տակ է գտնվել երկու տարուց ավելի: Իրաքի կառավարական զորքերը քաղաքի ազատագրման ցամաքային գործողությունները սկսել են 2016թ.-ի հոկտեմբերի 17-ին: