Միջազգային

Իրաքյան զինված ուժերը հայտարարել են, որ ԴԱԻՇ ահաբեկչական խմբավորման զինյալները պայթեցրել են Մոսուլի պատմական Ալ Նուրի մզկիթը, որն ընթացող պատերազմի արդյունքում պաշարված էր արդեն շուրջ ինը ամիս: Ըստ զեկույցի, մզկիթը պայթեցվել է մինարեթի (մահմեդական մզկիթներին կից աշտարակ, որի վրա բարձրանում են մոլլաները և հավատացյալներին աղոթքի հրավիրում) հետ միասին:
     Հենց այս մզկիթում երեք տարի առաջ, ԴԱԻՇ առաջնորդը Աբու Բաքր ալ-Բաղդադին հռչակել է «խալիֆաթ»:
     Իրենց հերթին ԴԱԻՇ-ի ներկայացուցիչները սեփական լրատվական գործակալության` «Ամակո»-ի միջոցով հայտարարել են, որ Ալ-Նուրի մզկիթի համալիրը ոչնչացվել է ԱՄՆ ռազմաօդային ուժերի կողմից:
     Իրաքի վարչապետ Հայդեր Ալ-Աբադին նշել է, որ մզկիթի պայթյունը եղել է ԻՊ-ի պարտության «պաշտոնական ընդունումը»:
     ԱՄՆ ռազմական հրամանատարությունն էլ հայտարարել է, որ խմբավորումը ոչնչացրել է «Մոսուլի և Իրաքի մեծագույն գանձը»:
     Նշենք, որ Մզկիթը կառուցվել է XII դարում, նրա շինարարությունն սկսվել է 1172 թվականին:
     Մզկիթի համալիրը գտնվում է Տիգրիսի աջ (դեպի արևմուտք) ափին:

     Ըստ ՄԱԿ-ի տվյալների` Մոսուլում մնացել է շուրջ 100 հազար մարդ: Նրանք ապրում են սննդի, դեղորայքի և ջրի անբավարար պայմաններում: Նախքան պատերազմի սկսվելը բնակիչներին խորհուրդ էր տրվել հնարավորության դեպքում լքել քաղաքը:
     Վերջին երկու շաբաթվա ընթացքում, ըստ ՄԱԿ-ի գնահատականներով, Մոսուլի արևմտյան մասում զոհվել է շուրջ 230 խաղաղ բնակիչ: Ոմանք զոհ են դարձել հրետանային և օդային ռմբակոծությունների, իսկ մյուսները փախուստի ճանապարհին սպանվել են ԴԱԻՇ-ի դիպուկահարների կողմից:
     Մոսուլն ազատագրելու իրաքյան ուժերի ռազմական օպերացիան, որը հովանավորում է ԱՄՆ-ն, շարունակվում է արդեն ինն ամիս: Զինյալները պահում են քաղաքը սկսած 2014 թվականի ամռանից: