Արաբական 4 պետություն` Բահրեյնը, Սաուդյան Արաբիան, Եգիպտոսը և ԱՄԷ-ն, խզել են դիվանագիտական հարաբերությունները Կատարի հետ:
Հարևան երկրի հետ դիվանագիտական հարաբերությունները խզելու մասին առաջինը հայտարարել է Բահրեյնը: Երկրի պաշտոնական գործակալության տարածած հաղորդագրության մեջ ասվում է, որ նման քայլը պայմանավորված է Դոհայի վարած քաղաքականության հետ, այն է` ահաբեկչության աջակցություն, Բահրեյնի թագավորության ներսում անվտանգության և կայունության խաթարում, երկրի ներքին գործերին միջամտություն, լարվածության սրում և ԶԼՄ-ների միջոցով սադրում: Բահրեյնը Կատարցի դիվանագետներին 48 ժամ է տվել երկրի տարածքը լքելու համար: Բացի այդ, պաշտոնական Մանաման դադարեցրել է օդային և ծովային հաղորդակցությունը Դոհայի հետ: Իշխանություններն արգելել են նաև երկրի քաղաքացիներին այցելել Կատար:
Բահրեյնի հայտարարությունից րոպեներ անց Կատարի հետ դիվանագիտական հարաբերությունների խզման մասին հայտարարել են նաև Էր Ռիադը, Կահիրեն և Աբու Դաբին:
Սաուդյան Արաբիան և Եգիպտոսը ևս դադարեցրել են այդ երկրի հետ ծովային ու օդային հաղորդակցությունը:
Արաբական Միացյալ Էմիրությունները Դոհային մեղադրել է ահաբեկչական, ծայրահեղական և աղանդավորական կազմակերպություններին հովանավորելու և աջակցելու համար:
Սաուդյան Արաբիայի գլախավորությամբ գործող արաբական կոալիցիան իր հերթին հայտարարել է, որ Կատարի մասնակցությունը Եմենում իրականացվող ռազմական գործողություններին դադարեցվում է:
Մեկնաբանելով արաբական երկրների որոշումը` ԱՄՆ պետքարտուղար Ռեքս Թիլերսոնն այդ պետություններին հորդորել է նստել բանակցությունների սեղանի շուրջ և վերացնել տարաձայնությունները:
