Հարցազրույցներ

     «Թալիշում շարունակվում են շինարարական աշխատանքները, որոնք սկսվել էին 2016-ի ապրիլյան քառօրյա պատերազմից հետո։ Գյուղապետարանի և հանդիսությունների համար նախատեսված շենքի վերանորոգումն ավարտելուց հետո մոտ օրերս կսկսվեն նաև նորակառույց դպրոցի և մանկապարտեզի շենքի նորոգման աշխատանքները, որոնց զուգահեռ կընթանան նաև անհատական 3 տների կառուցման աշխատանքները»,- այս մասին լրագրողների հետ զրույցում ասաց Մարտակերտի շրջանի Թալիշ համայնքի ղեկավար Վիլեն Պետրոսյանը։ Այս պահին Թալիշում բնակվում են 20-ից ավելի տղամարդիկ, ովքեր ունեն տարբեր զբաղվածություններ։ Թալիշի բնակչության մեծ մասը հաստատվել է Ալաշանում, նրանցից ոմանք ժամանակավոր ապաստանել են նաև շրջանից դուրս։ Նշենք, որ Ալաշանում բնակվողները ջրի և հոսանքի վճարումներ չեն կատարում։ «Ես համոզված եմ, որ վերաբնակեցվելուց հետո համայնքը կստանա առանձին կարգավիճակ, և բնակիչներին տրվող արտոնությունները կտարբերվեն մնացած բնակավայրերից»,- համայնքի ղեկավարի խոսքերն է փոխանցում Թալիշում գտնվող MAMUL.am-ի թղթակիցը։
     Խոսելով համայնքի կրած վնասների և դրանց փոխհատուցման մասին` Պետրոսյանն ասաց, որ կառավարությունն առաջին փուլով արդեն փոխհատուցել է։ «Թշնամու կողմից բնակիչների մեքենաների ավերումն ու վնասները փոխհատուցվել են։ Երկրորդ փուլով էլ կհատուցվի անասնագլխաքանակը և այդպես շարունակ»։ Վ. Պետրոսյանը նշեց, որ թեև բնակիչներն այս պահին Թալիշում չեն ապրում, բայց գյուղի հետ կապը չեն խզում. «Միշտ էլ այցելում են գյուղ, առավել ևս հիշատակի և տոնական օրերին։ Մայիսի 2-ն ընդունված է որպես հիշատակի օր. Հայաստանից և Ռուսաստանից ավելի շատ մարդիկ էին եկել, քան նախկինում»։
     Վերջում Վիլեն Պետրոսյանը շեշտեց. «Այս տարի Թալիշում բերքը շատ է, և ես վստահ եմ, որ մեր բնակիչները թափ են տալու Թալիշի թութը և քաղելու են Թալիշի ծառերի վրայի բերքը»։