ԱԺ «Ծառուկյան» խմբակցության պատգամավոր Նաիրա Զոհրաբյանն այսօր «Պետական պաշտոններ զբաղեցրած անձանց սոցիալական երաշխիքների մասին» Հայաստանի Հանրապետության օրենքում փոփոխություն կատարելու մասին քննարկման ընթացքում ՀՀ արդարադատության նախարարի առաջին տեղակալ Արթուր Հովհաննիսյանից հետաքրքրվեց` կա՞ վիճակագրություն, թե դատական համակարգում որքանով է նվազել կոռուպցիան։ «Չնայած առանց վիճակագրության էլ պարզ է, որ դատական համակարգում վիճակը՝ կոռուպցիայի առումով, շարունակում է մնալ ողբերգական, ինչքան էլ դալաններում դատավոր բռնեք հազար դոլար կաշառք վերցնելու պահին, կաբինետներում վերցվում են կաշառքներ և կայացվում են դատական վճիռներ, դա ակնհայտ է բոլորին», - հայտարարեց Նաիրա Զոհրաբյանը։ Ի պատասխան Զոհրաբյանին՝ Արթուր Հովհաննիսյանն ասաց, որ այս նախագծով իրենք չեն պայքարում կոռուպցիայի դեմ, «Կոռուպցիայի դեմ պայքարելու ենք մյուս նիստում»,- տեղեկացրեց նա: