«Ծառուկյան» դաշինքը երկու քարի արանքում է հայտնվել. «Ելք»-ի հետ քաղաքական բախումը չի բացառվում. «Իրատես»
 Առավել ուշագրավ են «Ծառուկյան» դաշինքի և «Ելքի» հարաբերությունները: Վերջինս հրապարակավ ամեն կերպ փորձում է «Ծառուկյան» խմբակցությունը բերել ընդդիմադիր դաշտ, որպեսզի իրենց օրենսդրական նախաձեռնությունների համար առավել պատկառելի ձայներ ապահովեն ու, ի վերջո, ցույց տան, որ իրենք կողմ են խորհրդարանական ընդդիմության միասնականությանը: Սակայն սա ընդամենը մեդալի մի երեսն է: Իրականում, մեր տեղեկություններով, «Ելքում» բավականին քամահրանքով են խոսում ընդդիմադիր այս ուժի մասին և հայտարարում, թե որքան նրանց «դեմքը» հանրությանը պարզ դառնա, այնքան իրենք կշահեն ու կհամարվեն միակ ընդդիմություն: Ի դեպ, «Ելք»-ականները չեն բացառում, որ ինչ-որ պահի կարող է և քաղաքական բախում լինել նրանց միջեւ, քանզի անդրանիկ նիստը ցույց տվեց, որ ընդդիմադիրների համագործակցությունը շատ դժվար է ստացվելու: Մյուս կողմից էլ, Գագիկ Ծառուկյանի թիմում «Ելքն» ընդունված չէ: Անկախ այն հանգամանքից, որ Ծառուկյանի սիրտը հեչ դեպի ընդդիմություն չի «քաշում», նրանք հատկապես «Ելքի» հետ չեն ցանկանում միևնույն կաթսայում «եփվել»: Բացի այդ, «Ծառուկյան» խմբակցության անդամները խիստ անհարմար վիճակում են հայտնվում, երբ ընտրում են ոչ թե «Ելքին», այլ իշխանությանը: Երկու քարի արանքում հայտնված այս ուժը թե որքան կարող է դիմակայել իշխանությանը և «Ելքի» ընդդիմանալու պահանջներին, դժվար է ասել, բայց ակնհայտ է, որ խորհրդարանում պատկառելի ներկայացվածություն ունեցող այս թիմը բնավ ցանկություն չունի մյուս ընդդիմադիր գործընկերոջ հետ նույն «թելը թելելու»: Մանրամասները` թերթի այսօրվա համարում: |
