Իրադարձություններ

Այսօր, լրագրողների հետ հանդիպմանը, խոսելով սահմանային իրավիճակից, Արցախի հակամարտության կարգավորման եղանակներից, արցախցի ռազմական և քաղաքական գործիչ Վահան Բադասյանը կարծիք է հայտնել, որ հայկական կողմի պատասխանն ադրբեջանական ցանկացած ագրեսիայի պետք է մի քանի անգամ ուժգին լինի։ «Միայն ծանր կորուստներ կրելու դեպքում Ալիևի վարչակարգը կհրաժարվի Արցախը վերցնելու մտքից… Եթե մեզ խփում են, մենք պարտավոր ենք 100 միլիմետրանոցով հակահարված տալ: Մեզ հարցնում են` չեք վախենո՞ւմ, որ պատերազմ կլինի: Բա ինչո՞ւ Ադրբեջանը մեր զինվորի կյանքը խլելով` չի վախենում: Պետք է այնպես անենք, որ իրենք վախենան պատերազմից: Եթե մի քանի զոհ էլ տանք, ընդհարում լինի, իրենք էլ զոհեր կունենան, ու հաջորդ անգամ չեն համարձակվի, ու ես սա ասում եմ նաև սեփական փորձից: Այն ժամանակ, երբ համարժեք էինք հակահարված տալիս, հարգում էին մեզ, փաստաթուղթը, Մինսկի խմբի հորդորները, իսկ այժմ չեն հարգում: Երկչոտ է հայկական կողմը ու սա էլ մեր ժողովրդի մեջ մտցնում են, որ Ադրբեջանը ռազմական առումով ավելի ուժեղ է: Ռազմական տեխնիկայի առավելությունը չէ պատերազմի հաղթանակի համար: Եթե մեր իշխանությունները հրահանգ տան ոչնչացնել այն կրակակետը, որից ոչնչացրել են մեր զինվորին, կհասկանան, որ մենք համարժեք պատասխան ենք տալիս ու առավել զգոն կլինեն»,- ասել է ազատամարտիկը` հավելելով, որ հաջողության հասնելու համար պետք է աշխատանքներ տանել դիվանագիտական, կրթական, մշակութային և տնտեսական ոլորտներում:
     Հարցին` հանարվո՞ր է հակառակորդը պատրաստվում է ռազամական նոր գործողությունների, քանի որ սահմանին հանգիստ չէ, ազատամարտիկն ասել է. «Եթե տեսնում ենք, որ պատերազմն անխուսափելի է, պետք է սթափ ուղեղով վերաբերվել դրան: Պետք չէ մեր ժողովրդին վախեցնել պատերազմով, ինչպես անում է առաջին նախագահը: Ու մեր մյուս նախագահների օրոք շարունակվում է դա, պետք չէ վախենալ դրանից, եթե այն չոքել է դռանդ: Եթե ուզում ես խաղաղություն, ուրեմն պետք է պատերազմի լավ պատրաստվես, և պատերազմից չպետք է վախենաս»:
     Բադասյանի խոսքով` Հայաստանն, ի վերջո, պիտի հրաժարվի անպտուղ բանակցություններից Բաքվի հետ՝ Արցախն ընդգրկելով իր կազմ. «Այսպես շարունակելով՝ մենք Ադրբեջանին հույս ենք տալիս, որ ինքը գրավի Արցախը։ Ինքը միայն Արցախը չի ուզում գրավել, ինքը և Զանգեզուրն է ուզում, և Վայոց Ձորն է ուզում, և վերջերս էլ Երևանն էր ուզում»։