«Ասում էին՝ լավագույն հնգյակում ես, բայց ինչ-որ պահի ինչ-որ բան պատահեց, և ամեն բան այնպես չանցավ»․ Արծվիկ
11:45, ուրբաթ, 19 մայիսի, 2017 թ.
«Եվրոտեսիլ-2017»-ի հայաստանյան ներկայացուցիչ Արծվիկն, ինչպես արդեն նշել էինք, զբաղեցրել էր 18-րդ հորիզոնականը: Երգչուհին ֆեյսբուքյան իր էջում շնորհակալություն է հայտնել և կիսվել զգացումներով: «Իմ թանկագիններ, իմ սիրելիներ, ես չեմ կարող խոսքերով փոխանցել այն զգացողությունները, որոնք ունեցել եմ վերջին կես տարվա ընթացքում, դա իսկապես անհավանական էր: Չեմ թաքցնում` եղել են և արցունքներ, և ուրախության պահեր: Եվ դա բնական է: Չէ՞ որ դեպի իմ երազանք տանող ուղին այնքան էլ հեշտ չէ, բայց ես ձեր օգնությամբ գնում եմ դրան ընդառաջ: Ձեր շնորհիվ ես հաղթեցի «Դեպի Եվրոտեսիլ» մրցույթում և դարձա այն մարդը, որը ներկայացրեց մեր մեծ հայրենիքը` Հայաստանը «Եվրոտեսիլ-2017»-ում: Դա ինձ համար իսկական հաղթանակ է, որովհետև իմ բեմական պրոֆեսիոնալ գործունեության 5 տարիների համեմատ դա ֆանտաստիկ արդյունք է: Իրականում այն, ինչ կատարվում է ինձ հետ, կարծես մի հետաքրքրաշարժ ֆիլմի սյուժե լինի: Այո՛, երազանքները կատարվում են, և դա ճիշտ է: Պետք է ձգտես շատ աշխատել ինքդ քեզ վրա, որովհետև իրականում երջանկություն է այդ բեմի վրա կանգնելը, հատկապես երբ լսում ես, որ դու համարվում ես ֆավորիտ, և քո մասին խոսում են բոլորը: Ասում են, որ դու քեզ արդարացրել ես 100%-ով: Ասում են, որ դու լավագույն հնգյակում ես, բայց ինչ-որ պահի ինչ-որ բան պատահեց, և ամեն բան այնպես չանցավ: Հավանաբար դա ճակատագիր է, և հետագայում արդեն ինձնից ոչինչ կախված չէր: Ես անսահման ուրախ եմ, որ ինձ լսել են միլիոնավոր մարդիկ: Դա յուրաքանչյուր արտիստի համար երազանք է, հավատացեք: Ուզում եմ շնորհակալություն հայտնել իմ թիմին, որոնք միշտ իմ կողքին է և ամեն ինչում ինձ աջակցում է, դա անգնահատելի է: Ես իսկապես անսահման երջանիկ եմ ու վստահաբար կարող եմ ասել, որ շուտով ձեզ կուրախացնեմ իմ նոր ստեղծագործություններով, քանի որ դուք գիտեք, ես տեղում մնալ չեմ սիրում: Սիրում եմ բոլորիդ, շնորհակալ եմ, որ դուք կաք իմ կյանքում»: |
7324 | 3