Խորհրդարանական ընտրություններից առաջ «ՍԱՍ գրուպ»-ում տեղի ունեցած ժողովի սկանդալային ձայնագրության հետ կապված որևէ տեղաշարժ չի արձանագրվել։ ՀՔԾ-ն այդպես էլ չի հայտնել` հարցաքննե՞լ են ժողովը վարող անձին, թե՞ ոչ, և, առհասարակ, գործով մեղադրյալ կա՞, թե՞ ոչ:
MAMUL.am-ի թղթակցի հետ զրույցում Հատուկ քննչական ծառայության մամուլի խոսնակ Մարինա Օհանջանյանն ասաց, որ նախաքննությունը շարունակվում է և գաղտնիությունից ելնելով՝ այս պահին մանրամասներ չի կարող հաղորդել:
Ըստ մամուլի՝ տպավորությունն այն է, որ գործը սառեցնում են՝ ժամանակ անց կարճելու համար:
Հիշեցնենք, որ ապրիլի 13-ին համացանցում հայտնվեց
ձայնագրություն, որտեղ 2017 թվականի ապրիլի 2-ին խորհրդարանական ընտրություններից առաջ «ՍԱՍ գրուպ»-ի ղեկավարությունն աշխատակիցներին ժողովի էր հրավիրել, որտեղ քննարկել էին, թե ով ինչքան ձայն պետք է բերեր թիվ 2 ընտրատարածքում ռեյտինգային ընտրակարգով առաջադրված «ՍԱՍ գրուպի» սեփականատեր Արտակ Սարգսյանի օգտին:
Ձայնագրության առթիվ Հատուկ քննչական ծառայությունը
քրեական գործ է հարուցել: