«Բարոյական ի՞նչ իրավունքով ես քո ազգային մշակույթը տալիս վարձակալության դրսի ընկերությանը». բնապահպանն ահազանգում է
Բնապահպան Գալուստ Նանյանը մշտապես ուշադրության կենտրոնում է պահում բնապահպանական խնդիրներն ու հաճախ ահազանգում` դրանց լուծման տարբերակներ գտնելու ակնկալիքով: Գալուստ Նանյան Գալուստ Նանյանի խոսքով` բազում հուշարձաններ տվել ենք մասնավորին, բայց մեխանիզմներ չկան մշակված, որ եթե մասնավորն այլ գործողություն անի, ինչ պատիժ է հասնելու նրան: «Երբ Արենիի քարանձավում հայտնաբերվեց 5000 տարվա պատմություն ունեցող աշխարհի առաջին կոշիկը, և այդ քարանձավի 90%-ը դեռևս ուսումնասիրված չէ, ու դու դա տալիս ես մասնավորին` չունենալով մեխանիզմներ, թե նա ինչպես կշահագործի, ո՞ւր մնաց պետական մտածելակերպն այս դեպքում»,- նշեց մեր զրուցակիցը: ««Մագելանի», «Մոզրովի» և «Թռչունների» քարանձավներում ապրում են 3000 տեսակի չղջիկներ, որոնք միայն այս տարածքում են լինում, այդ տարածքը տալ մասնավորին՝ աբսուրդ է... Երբ նախարարին մի առիթով հարցրեցին՝ կա՞ն վարձակալությամբ տրվող մրցույթին մասնակցելու դիմողներ, պատասխանեց. «Չկան, բայց հույս ունենք, որ արտասահմանյան ընկերությունները դրսից կդիմեն»: Հարց է առաջանում՝ բարոյական ի՞նչ իրավունքով ես դու քո ազգային մշակույթը տալիս վարձակալության դրսի ընկերությանը: Այսինքն` քո մշակույթը տալիս ես դրսին կառավարելու: Դրանով դու ինքնըստինքյան վերջ ես դնում ազգայինի պահպանմանն ու նպաստում ավիրման քաղաքականությանը»,- մտահոգություն հայտնեց բնապահպանը: Գալուստ Նանյանի համոզմամբ` երկրի այցեքարտը մշակույթն է և բնությունը: «Եթե այդ երկու այցեքարտն ամուր պահենք մեր ձեռքում, թեʹ տնտեսապես, թեʹ ֆինանսապես շատ օգուտներ կարող ենք ունենալ: Եթե այդ 2 այցեքարտերը մեր ձեռքից բաց թողնենք, երկիրը կգնա կործանման»,- ամփոփեց նա: |