Միջազգային

Բրազիլիայում մի քանի բնիկ ցեղախմբերի՝ մոտ 5000 ներկայացուցիչների խաղաղ ցույցը վերածվել է կառավարական ուժերի հետ բախումների: Այս մասին հայտնում է Reuters-ը: Ցույցին մասնակցող տեղաբնիկները դժգոհում են կառավարության նոր որոշումից, որի համաձայն խոշոր ձեռնարկատերերն իրավունք են ստանում ձեռք բերելու հնդկացիական ցեղերի բարեբեր հողերը: Երբ ցուցարարները դուրս են եկել խաղաղ ցույցի համար իրենց հատկացված սահմաններից, ոստիկանությունը նրանց ուղղությամբ ձայնախլացնող ռումբեր, ռետինե փամփուշտներ է նետել: Տեղաբնիկները պատասխանել են նետուաղեղներով: Մի քանի տեղաբնակ թեթև վնասվածք է ստացել, ոստիկանների շարքերում տուժողներ չկան:

Ցուցարարներն իրենց հետ կառավարության շենքի մոտ են բերել մոտ 200 դագաղներ՝ ի նշան բնիկ ժողովուրդների ցեղասպանության, որն իրականացնում է Բրազիլիայի իշխանությունը:

Տեղաբնիկները նաև ասել են, որ ոստիկանության կողմից իրականացվող ճնշումները ոչինչ են այն բռնությունների, հալածանքների ու սպանությունների համեմատ, որոնց ամեն օր ենթարկվում են իրենք՝ ագրոբիզնեսի հսկաների ուղարկած ուժերի կողմից:

Ցուցարարների մի մասը վրաններ է խփել կառավարության դիմաց ու մտադիր է այնտեղ մնալ մեկ շաբաթ, մինչև իրենց հարցը չլուծվի: