Էրդողանը ցավակցական ուղերձ է հղել Թուրքիայի հայությանը
Թուրքիայի նախագահ Ռեջեփ Էրդողանն ապրիլի 24-ի առիթով հատուկ ցավակցական ուղերձ է հղել Թուրքիայի հայությանը: Էրդողանն այս անգամ ևս Հայոց ցեղասպանությունը որակել է որպես Առաջին համաշխարհայինի տարիներին տեղի ունեցած ցավալի իրադարձություններ: «Իմ շատ թանկագին հայազգի քաղաքացիներ, սիրով ու հարգանքով ողջունում եմ ձեզ: Առաջին համաշխարհայինի ծանր տարիներին կյանքը կորցրած հայերի հիշատակը հարգում, իսկ նրանց թոռնիկներին հայտնում եմ իմ ցավակցությունը: Որպես այս տարածքի երկու հնագույն ժողովուրդներ` հայերն ու թուրքերը հազարամյակներ ապրել են միասին, կիսել միմյանց հետ պատմություն ու մշակույթ: Հայ համայնքը թե՛ Օսմանյան կայսրության տարիներին, թե՛ հանրապետական Թուրքիայի ժամանակաշրջանում այս երկրին տվել է բազմաթիվ թանկագին զավակներ, որոնք իրենց ուրույն ներդրումն են ունեցել մեր երկրի զարգացման գործում: Այսօր էլ, ինչպես երեկ, մեր հայ քաղաքացիները շարունակում են իրենց կարևոր դերը ստանձնել մեր երկրի քաղաքական, սոցիալական և տնտեսական կյանքում», - նշել է Էրդողանը: Նա հայտարարել է, որ Թուրքիայի իշխանություններն ակտիվ աշխատանքներ են տանելու Թուրքիայի տարածքում հայկական մշակութային ժառանգության պահպանության հարցում: Թուրքիայի նախագահը նաև հույս է հայտնել, որ Պոլսո Հայոց պատրիարքի ընտրությունների ընթացքի մեկնարկը կտրվի մոտ ապագայում և հաջողություն մաղթել պատրիարքարանի աշխատակիցներին իրենց այդ գործում: |