Հյուսիսային Կորեայից հրթիռների շարունակական արձակման հետևանքով լարվածության աճի ֆոնին Միացյալ Նահանգները հարվածային նավատորմ է տեղակայում Կորեական թերակղզու խաղաղօվկիանոսյան ափերին` «Կառլ Վինսոն» ավիակրի գլխավորությամբ, հայտնում է BBC-ն:
«Տարածաշրջանում համար մեկ սպառնալիքը շարունակում է մնալ Հյուսիսային Կորեան իր անխելամիտ, անպատասխանատու և անկայունացնող հրթիռային ծրագրի և միջուկային զենք ունենալու ձգտումների կապակցությամբ»,- հայտարարել է ԱՄՆ Խաղաղօվկիանոսյան նավատորմի ղեկավար Դևիդ Բենհեմը:
Հիշեցնենք, որ ավելի վաղ ԱՄՆ նախագահ Դոնալդ Թրամփը հայտարարել է, որ Հյուսիսային Կորեային թույլ չի տա ստեղծել այնպիսի հրթիռներ, որոնք կարող են հասնել ԱՄՆ տարածքներ, և որ Վաշինգթոնն, անհրաժեշտության դեպքում, ինքնուրույն կլուծի այդ հարցը: