Իրադարձություններ

Երեկ Ստեփանակերտում տեղի է ունեցել Արցախի նախագահ Բակո Սահակյանի և ԵԱՀԿ ՄԽ ֆրանսիացի համանախագահ Ստեֆան Վինսկոնսինի հանդիպումը: Հանդիպումից հետո լրագրողների հետ ճեպազրույցում ֆրանսիացի համանախագահ Ստեֆան Վիսկոնտինն ասել է, որ առաջին անգամ է Ստեփանակերտում և հիացած է նրա գեղեցկությամբ, ինչն իր համար հաճելի անակնկալ էր: Այս մասին հաղորդում է Artsakhpress-ը:

Խոսելով բանակցությունների մասին՝ ֆրանսիացի համանախագահն ասել է, որ գործընթացը շարունակվում է, և շատ հագեցած երկխոսություն կա կողմերի հետ: «Բոլորի համար չէ դա տեսանելի, բոլորը չէ, որ գիտեն այդ մասին։ Իհարկե մենք չենք կարող բացահայտել մանրամասները, քանի որ կոնֆիդենցիալ բանակցություններ են ընթանում։ Բայց դա չի նշանակում, որ ոչինչ չի արվում։ Բանակցությունները շարունակելու համար անհրաժեշտ է, որպեսզի շփման գծում հրադադարի ռեժիմի խախտման դեպքեր չարձանագրվեն, իսկ առաջ գնալու համար կողմերը պետք է փոխզիջման գան»,- ասել է Վիսկոնտին և հավելել, որ եթե Հայաստանի ու Ադրբեջանի նախագահների միջև պայմանավորվածություն ձեռք բերվի հանդիպման մասին, իր երկիրը պատրաստ է այն կազմակերպել: