Կենտրոնական ընտրական հանձնաժողովի նախագահ Տիգրան Մուկուչյանն այսօր, լրագրողների հետ զրույցում տեղեկացրել է, որ ուսումնասիրում են երեկ «Իրազեկ քաղաքացիներ» ՀԿ համակարգող Դանիել Իոաննիսյանի կողմից հրապարակած ձայնագրությունները, որոնցից պարզ է դառնում, որ մի շարք մանկապարտեզների ու դպրոցների տնօրեններ խոստովանում են աշխատակիցներին ցուցակագրելու հանգամանքը: «Իոաննիսյանից վերցրել ենք բոլոր տնօրենների ձայնագրությունները, հիմա ընթանում են ուսումնասիրություններ: Այդ ամբողջը պետք է լսել, յուրաքանչյուրն իրենց ներկայացնում է մեկ ինքնուրույն փաստական հանգամանք: Կլսենք, արդյունքում մեր դիրքորոշումների վերաբերյալ կիրազեկենք ձեզ»,- ասել է նա:
Խոսելով «Ելք» դաշինքի անդամ, փաստաբան Նիկոլայ Բաղդասարյանի դիմումի մասին, ըստ որի, վերջինս պահանջում է պատգամավորի թեկնածու Առաքել Մովսիսյանի գրանցումն անվավեր ճանաչել, Մուկուչյանը տեղեկացրել է, որ դիմումը քննարկվելու է այսօր: «Կքննարկենք, որոշումը կլինի՝ կիմանաք»,- տեղեկացրել է Մուկուչյանը: